Эл аралык CASA-1000 энергетикалык долбоорунун алкагында Кыргыз Республикасынын аймагында буга чейин 346 тирөөч орнотулуп, 456 чакырым электр өткөргүч линиялары курулган, «Датка» көмөкчордонунда жаңы уячанын курулушу уланууда. Бул тууралуу энергетика министри Таалайбек Ибраев 15-майда Душанбеде (Тажикстан) өткөн долбоордун өкмөттөр аралык кеңешинин жыйынында билдирди.

Жыйынга Кыргызстандын, Тажикстандын, Ооганстандын жана Пакистандын энергетика министрлери, ошондой эле улуттук энергетикалык компаниялардын жетекчилери катышты. Талкуунун негизги темасы долбоорду ишке ашыруунун негизги маселелери, анын ичинде техникалык, финансылык жана уюштуруу аспектилери болду.

«CASA-1000 аймактык кызматташтык тарыхынын жаңы барагын ачат.Долбоор жакшы коңшулаштык мамилелерди чыңдоого, жашоо деңгээлин жогорулатууга, энергетикалык коопсуздукка жана катышуучу өлкөлөрдүн экономикасынын туруктуу өсүшүнө өбөлгө түзөт», – деп баса белгиледи министр Таалайбек Ибраев.

Анын айтымында, Кыргызстан долбоорду 2027-жылга чейин бүтүрүүгө чечкиндүү. Жаңы энергетикалык каттамдар ишке киргенден кийин Түштүк Азия өлкөлөрүн таза ГЭС менен камсыздоого мүмкүнчүлүк түзүлөт.

Жыйындын соңунда Кыргызстандын, Тажикстандын энергетика министрлери, Ооганстан менен Пакистандын өкүлдөрү өкмөттөр аралык кеңештин резолюциясына кол коюшту, анын максаты CASA-1000ди коммерциялык ишке киргизүүнү тездетүү.

Шилтеме:CASA-1000 – Кыргызстан менен Тажикстандан Ооганстан менен Пакистанга электр энергиясын өткөрүү боюнча эл аралык долбоор. Анда 500 кВ электр берүү линияларын куруу жана энергетикалык инфраструктураны өнүктүрүү каралган. Долбоордун аркасында Кыргызстан төмөнкүлөргө мүмкүнчүлүк алат:

• жай мезгилинде ашыкча электр энергиясын экспорттоо,
• валюталык киреше алуу,
• энергетика системасын модернизациялоо,
• түштүк аймактарда инфраструктураны өнүктүрүү,
• жумуш орундарын түзүү жана өлкөнүн энергетикалык коопсуздугун чыңдоо.