Балыкчы-Кочкор-Кара-Кече-Макмал темир жол линиясынын курулушу Балыкчыдан 43 чакырым алыстыкка жылганын президент Садыр Жапаров 1-августта “Кыргыз темир жолунун” 100 жылдыгына арналган салтанатта билдирди.

Ал белгилегендей, республика Советтер Союзунан 424,6 чакырым темир жолду мураска алган, бирок эгемендүүлүк жылдарында бир дагы жаңы линия курулбай, алардын саны азайган.

Президенттин айтымында, 2020-жылга чейин темир жол тармагы каржылык кыйынчылыктарды башынан кечирип, жарым миллиард сомдон ашык карызга баткан.

Бийлик 2022-жылдын жаз айларында «Кыргыз темир жолу» мамлекеттик ишканасынын күчү жана каражаттары менен ишке ашырылып жаткан «Балыкчы – Кочкор – Кара-Кече – Макмал» масштабдуу долбоорун ишке киргизди.

Учурда 43 чакырым курулуш бүткөрүлүп, ага төрт миллиард сомго жакын каражат жумшалды.

Бул долбоор өлкөнүн транспорттук инфраструктурасын бир топ жакшыртып, түштүк менен түндүктү темир жол аркылуу байланыштырат, бул күйүүчү майды үнөмдөөгө жана жолдордун сапатын сактоого шарт түзөт.

Жаңы коридор Кыргызстанды Кытайдын, Борбордук Азиянын жана Европанын рыноктору менен байланыштырган эл аралык транспорт тармагынын бир бөлүгү болуп калат, бул өлкөнүн геосаясий туруктуулугу жана экономикасы үчүн маанилүү.

Ошондой эле темир жол тармагы Иран аркылуу Перс булуңуна деңизге чыгуу менен өлкөнү транспорттук туюктан чыгарууга жардам берет.

Сүрөт: «Кыргыз Темир-Жолу».