Кытайдын Тяньцзинь шаарында Шанхай кызматташтык уюмуна (ШКУ) мүчө мамлекеттердин өсүмдүктөрдүн карантини боюнча мекемелеринин жетекчилеринин экинчи жыйыны өттү. Иш-чарага катышуучу өлкөлөрдүн тиешелүү ведомстволорунун өкүлдөрү, анын ичинде КР Суу чарба, айыл чарба жана кайра иштетүү өнөр жай министрлигинин Химизациялоо, өсүмдүктөрдү коргоо жана карантин департаментинин кызматкерлери катышты.

Жолугушуунун негизги темалары:

• фитосанитардык жол-жоболорду шайкеш келтирүү жана алдыңкы тажрыйбаларды алмашуу аркылуу айыл чарба продукциясынын эл аралык рынокторго жеткиликтүүлүгүн кеңейтүү;
• карантиндик зыянкечтерге каршы күрөшүүнүн биргелешкен механизмдерин иштеп чыгуу;
• фитосанитардык абалдын мониторингин жана контролун уюштуруу;
• фитосанитардык сертификаттарды электрондук алмашуу системасын ишке ашыруу;
• фитосанитардык көзөмөлдөөдө заманбап интеллектуалдык технологияларды колдонуу.

Жыйындын жыйынтыгында эки тараптуу жолугушуулардын протоколуна кол коюлуп, ШКУга мүчө мамлекеттердин өсүмдүктөрдүн карантини боюнча ыйгарым укуктуу органдарынын башчыларынын биргелешкен билдирүүсү кабыл алынды.

Кыргыз тараптын жолугушууга катышуусу ата мекендик айыл чарба продукциясын, өзгөчө мөмө-жемиштерди Кытай, Индия, Пакистан, Иран жана башка ШКУ өлкөлөрүнүн рынокторуна жылдыруу үчүн маанилүү. Жүргүзүлгөн сүйлөшүүлөр кызматташтыкты чыңдоого, фитосанитардык талаптарды шайкеш келтирүүгө, экспорттук жол-жоболорду жөнөкөйлөтүүгө жана кыргызстандык өндүрүүчүлөр менен экспортерлордун атаандаштыкка жөндөмдүүлүгүн жогорулатууга өбөлгө түзөт.