2025-жылдын 8-июлунда Кыргыз Республикасынын Албания Республикасындагы Атайын жана Ыйгарым укуктуу Элчиси, резиденциясы Анкара шаарында бир эле убакта Руслан Казакбаев Албаниянын Тышкы иштер жана Европа иштери боюнча министрлигинин Мамлекеттик протоколунун директору Ариан Спассасага ишеним грамотасынын көчүрмөсүн тапшырды.

Албан тарап кыргыз дипломатын кызуу куттуктап, тажрыйбалуу саясатчы жана дипломаттын дайындалышы Кыргыз Республикасынын эки тараптуу мамилелерди өнүктүрүүгө кызыкдар экенин көрсөтүп жатканын баса белгиледи. Руслан Казакбаевге дипломатиялык миссиясына ийгилик каалады.

Ушул эле күнү Кыргызстандын элчиси Албаниянын Европа жана тышкы иштер министринин орун басары Эндрит Изейраж менен жолугушту. Сүйлөшүүлөрдүн жүрүшүндө саясий диалогду бекемдөө жана түрдүү тармактарда кызматташууну активдештирүү маселелери талкууланды.

Тараптар макулдашты:

• саясий, маданий-гуманитардык, илимий, билим берүү жана соода-экономикалык чөйрөлөрдө өз ара аракеттенүүнү активдештирүү;
• соода-экономикалык кызматташтык боюнча өкмөттөр аралык комиссияны түзүү мүмкүнчүлүгүн кароо;
• Кыргыз Республикасынын Жогорку Кеңешинде жана Албаниянын Парламентинде парламенттер аралык достук топторун түзүү боюнча иштерди жүргүзүү;
• ез ара визиттерди жогорку денгээлде уюштурушат.

Мындан тышкары, кыргыз тарап Албаниянын Европа жана тышкы иштер министри Игли Хасаниге Кыргыз Республикасынын Тышкы иштер министрлигинин башчысы Жээнбек Кулубаевдин расмий чакыруусун тапшырды.

Элчи Казакбаев эки өлкөнүн ортосундагы келишимдик-укуктук базаны кеңейтүү, анын ичинде экономика, билим берүү жана саламаттыкты сактоо тармагындагы келишимдерге кол коюу зарылдыгын белгиледи. Ошондой эле Кыргызстан менен Албаниянын эл аралык платформалардагы өз ара аракеттенүүсү талкууланды.