Исламабадда соода-экономикалык жана илимий-техникалык кызматташтык боюнча кыргыз-пакистан өкмөттөр аралык комиссиясынын 5-жыйыны өттү. Бул тууралуу КР Экономика министрлиги билдирди.

Кыргыз Республикасынын делегациясын Министрлер Кабинетинин Төрагасынын орун басары Эдил Байсалов жетектеп барды.

Иш-чаранын жүрүшүндө тараптар эки тараптуу өнөктөштүктү кеңейтүү, мурда жетишилген макулдашууларды иш жүзүндө ишке ашыруу жана эки өлкөнүн бизнес коомчулугунун ортосунда көптөгөн тармактарда түз байланыштарды түзүү маселелерин талкуулашты.

Жолугушуунун жыйынтыгында Кыргыз Республикасынын Экономика жана коммерция министрлигине караштуу “Халал индустриясын өнүктүрүү борбору” мамлекеттик мекемесинин директору Алмаз Кайырбеков Пакистандын Халал агенттиги менен халал соода чөйрөсүндө өз ара түшүнүшүү жана кызматташуу жөнүндө меморандумга кол койду.

Кол коюлган келишим халал продукциясын сатуудагы техникалык тоскоолдуктарды кыскартууга, эки өлкөнүн халал сертификаттоо органдарынын кызматташуусуна жана өз ара таануусуна, ошондой эле Кыргыз Республикасы менен Пакистан Ислам Республикасынын ортосундагы экономикалык кызматташтыкты тереңдетүү жана стратегиялык өнөктөштүктү бекемдөө үчүн жагымдуу шарттарды түзүүгө багытталган.