Кыргыз билим берүү академиясынын президенти Назира Дюшеева Кыргыз Республикасы менен Россия Федерациясынын ортосунда бирдиктүү билим берүү мейкиндигин түзүүнүн келечегине токтолду.

Бул демилгени биринчи жолу Санкт-Петербург эл аралык экономикалык форумунун жүрүшүндө КР Президенти Садыр Жапаров көтөргөн. Ошондо ал Россиянын президенти Владимир Путинге бирдиктүү билим берүү мейкиндигинин принциптерин биргелешип иштеп чыгууну сунуштаган. Андан соң сүйлөшүүлөр Москвада уланып, анын жыйынтыгында идеяны ишке ашыруунун концепциясын жана жол картасын иштеп чыгуу тапшырылды.

Назира Дюшееванын айтымында, бирдиктүү билим берүү мейкиндигин түзүүнүн максаты – Евразия экономикалык биримдигинин (ЕАЭБ) алкагында эмгек рыногунун тоскоолдуксуз иштеши үчүн шарттарды түзүү, анда билим берүү экономиканы өнүктүрүүдө негизги ролду ойнойт.

Кыргызстан менен Россиянын билим берүү системасын синхрондоштуруу бир нече маанилүү багыттарды камтыйт:

Сапаттуу билимге бирдей жеткиликтүүлүктү камсыз кылуу – мектептен баштап университетке чейин;
бирдиктүү билим берүү стандарттарын жана методдорун иштеп чыгуу;
Окуучулардын жана мугалимдердин мобилдүүлүгүн жогорулатуу;
Дипломдорду жана сертификаттарды өз ара таануу;
Санариптик билим берүү платформаларынын интеграциясы.

Кыргыз билим берүү академиясы мугалимдердин күнүмдүк практикасында колдонула турган окуу пландарын жана мамлекеттик стандарттарды координациялоо боюнча активдүү иш алып барууда. Физика, математика, биология сыяктуу предметтер боюнча билимдердин жалпы «фундаменталдык өзөгүн» калыптандырууга өзгөчө көңүл бурулат. Бул мектеп окуучуларына окуусун эркин улантууга же чет өлкөдө иштөөгө мүмкүнчүлүк берет.