Кыргызстан менен Сауд Аравиясы расмий түрдө биргелешкен ишкер кеңеш түзүшкөнүн КР Соода-өнөр жай палатасынын басма сөз кызматы билдирди.

Уюмдун маалыматына ылайык, КР Соода-өнөр жай палатасынын президенти Темир Сариев менен Сауд Аравиянын Соода-өнөр жай палатасынын төрагасы Хасан Моажеб Аль-Хувайси кыргыз-сауд бизнес кеңешин түзүү боюнча келишимге кол коюшту.

«Бул кадам биринчи жолугушууда башталган конструктивдүү диалогдун жыйынтыгы болуп, учурда жогорку деңгээлде формалдууланды», — деп айтылат маалыматта.

Кеңеш биргелешкен долбоорлорду ишке ашыруу, сооданы кеңейтүү жана энергетика, курулуш, айыл чарба, саламаттыкты сактоо жана туризм тармагына инвестиция тартуу үчүн негизги аянтча болуп калат.