2025-жылдын 11-июнунда Монголияда электрондук таштандыларды сорттоочу жана кайра иштетүүчү заводдун салтанаттуу ачылышы болуп өттү. Салтанатка Кыргыз Республикасынын Монголиядагы Атайын жана Ыйгарым укуктуу Элчиси Айбек Артыкбаев катышып, куттуктоо сөзүн сүйлөдү.

Завод Кыргызстандын, Монголиянын жана Япониянын жеке компанияларынын кызматташуусунун алкагында Япониянын эл аралык кызматташтык агенттигинин (JICA) колдоосу менен түзүлгөн. Жаңы ишканада электрондук таштандыларды, анын ичинде Кыргыз Республикасынын аймагынан ташылып келген таштандыларды кайра иштетүү пландаштырылууда.

Биринчи этапта Кыргызстан Монголияга колдонулган компьютердик такталардын биринчи партиясын экспорттогон. Буга чейин, 2024-жылы Кыргыз Республикасынын Монголиядагы элчилигинин демилгеси менен Япония жана Монгол компанияларынын өкүлдөрү Кыргызстанга иш сапары менен келишип, алар жеткирүү потенциалына алдын ала баа беришкен.

Келечекте Кыргызстандан электрондук таштандыларды жаңы заводго кайра иштетүү үчүн үзгүлтүксүз жеткирүү пландалууда. Бул долбоор туруктуу экологиялык чечимдерди жана таштандыларды коопсуз таштоо жаатында эл аралык кызматташтыкты өнүктүрүүдө олуттуу кадам болуп саналат, ошондой эле Кыргызстан, Монголия жана Япониянын ортосундагы экономикалык байланыштарды чыңдоого салым кошот.