2025-жылдын 7-апрелинен 25-апрелине чейин Кыргыз Республикасынын Балдардын укуктары боюнча ыйгарым укуктуу өкүлүнүн Катчылыгы Кыргызстан профсоюздар федерациясы менен биргеликте 9-11-класстын окуучуларын камтыган масштабдуу улуттук билим берүү кампаниясын өткөрдү. Акциянын максаты өспүрүмдөрдүн укуктук сабаттуулугун жогорулатуу, эмгекти эксплуатациялоонун алдын алуу жана жаштар арасында эмгек укуктарын сыйлоо маданиятын өнүктүрүү болгон.

Акциянын алкагында республиканын тогуз шаарындагы: Бишкек, Токмак, Жалал-Абад, Баткен, Каракол, Талас, Ош, Нарын жана Кара-Балта шаарларынын 60 мектебинде ачык сабактар уюштурулду. Иш-чараларга жалпысынан 5850 мектеп окуучулары катышты. Сабактын интерактивдүү форматы материалды эффективдүү өздөштүрүүсүнө өбөлгө түздү.

Акциянын жүрүшүндө эмгек мыйзамдарынын негизги жоболорун түшүндүрүүгө өзгөчө көңүл бурулду: ишке орноштурууда курактык чектөөлөр, жашы жете электерге эмгектин алгылыктуу түрлөрү, жумуш убактысы, ошондой эле эксплуатациядан, мажбурлоодон жана басмырлоодон коргоо механизмдери.

Мектеп окуучулары эмгек укуктары бузулган учурда кандай иш-аракет кылуу керектиги боюнча практикалык кеп-кеңештерди, ошондой эле кесиптик бирликтерден, балдарды коргоо органдарынан жана Мамлекеттик эмгек инспекциясынан колдоо алуу мүмкүнчүлүктөрү тууралуу маалымат алышты.

Белгилей кетсек, бул демилге Балдарды жана жаштарды укуктук тарбиялоого, балдардын укуктарын коргоо маселелери боюнча мамлекеттик органдар жана коомдук уюмдар менен өз ара аракеттенүүгө, ошондой эле бул чөйрөдөгү мыйзамдарды өркүндөтүү боюнча сунуштарды иштеп чыгууга багытталган Балдардын укуктары боюнча ыйгарым укуктуу өкүлдүн Катчылыгынын системалуу ишинин бир бөлүгү болуп саналат.