Кыргыз Республикасынын Билим берүү министрлиги санариптик дипломдорду ведомстволор аралык электрондук өз ара аракеттенүүнүн «Тундук» улуттук системасында жайгаштырууну баштады. Биринчи этапта 2025-жылы берилген дипломдор боюнча маалыматтар системага киргизилген.

Эми мамлекеттик органдар жана кызыкдар уюмдар берилген дипломдор тууралуу маалыматты электрондук форматта – тез, ыңгайлуу жана жарандардын кагаз көчүрмөсүн берүүнү талап кылбастан ала алышат.

Санариптик дипломдорду киргизүү билим берүү маалыматтарынын ишенимдүүлүгүн жана ачыктыгын камсыз кылат, квалификацияны тастыктоо жол-жоболорун жөнөкөйлөтөт, иш кагаздарын кыскартат жана документтерди жасалмалоо коркунучун азайтат.

"Санариптик дипломдорду киргизүү – бул санариптик билим берүү инфраструктурасын куруудагы олуттуу кадам. Биз ачык, эффективдүү жана технологиялык системага багыт алууну улантып жатабыз", – деп белгиледи Кыргыз Республикасынын Билим берүү министри Динара Кендирбаева.

Долбоор Кыргыз Республикасынын Санариптик өнүктүрүү министрлигинин техникалык колдоосу менен жана Тундук платформасы аркылуу ишке ашырылган.

Кыргыз Республикасынын Илим, жогорку билим берүү жана инновациялар министрлиги бүтүрүүчүлөрдүн бирдиктүү санариптик базасын түзүү үчүн мурунку жылдары берилген дипломдорду санариптештирүүнү улантат.