Кыргызстан мусулмандар дин башкармалыгы “Таба” ЖЧКсынын колдоосу менен 25 имамды ыйык Медина шаарына араб тилин үйрөнүү боюнча кыска мөөнөттүү курска жөнөтөт. Бул тууралуу муфтияттын басма сөз кызматы билдирди.

Сапарда дин ишмерлери араб тили боюнча билимдерин өркүндөтүп гана тим болбостон, Мадинанын тарыхый ыйык жерлерин зыярат кылып, умра амалдарын аткарышат.

Коштошуу аземинде КР Президентине караштуу Дин иштери жана этностор аралык мамилелер боюнча улуттук агенттиктин экспертиза жана диний уюмдар менен кызматташуу бөлүмүнүн башчысы Айбек Иминов катышуучуларга окуудан ийгиликтүү өтүп, ак жол каалады. Муфтият кызматкери Равшан ажы Эратов «Таба» фирмасынын башкы директору доктор Абдул-Илах аль-Мушаррафка ыраазычылык билдирип, имамдарды ар бир мүнөтүн пайдалуу пайдаланууга чакырды.

Иш-чара Кыргызстан Ислам университетинин жыйындар залында өттү. Ага КИУнун проректору Абдиваси ажы Матраимов, араб тили мугалими Амин Фатхии, муфтияттын өкүлдөрү жана республиканын 7 облусунан жана 2 шаарынан тестирлөөнүн жыйынтыгы менен тандалган имамдар катышты. Алар жакын арада Мадинага учат.