Улуттук статистикалык комитеттин алдын ала маалыматы боюнча, 2025-жылдын январь-март айларында Кыргызстанга чет өлкөлүк инвестициялардын агылып кирүүсүнүн көлөмү (чыгууларды эсепке албаганда) 1 376,2 миллион АКШ долларын түздү, бул 2024-жылдын ушул мезгилине салыштырмалуу (1 622,1 миллион доллар) 15,2%га аз.

Мында түз чет элдик инвестиция 44%га өсүп, 288,3 млн долларга жеткен. Инвестициялардын жалпы көлөмүндө алардын үлүшү 2024-жылдагы 12,3%дан 2025-жылы 20,9%га чейин өстү. Портфелдик инвестиция дагы 1,5 млн доллардан 3,4 млн долларга чейин өстү, ал эми башка инвестициялар 1412,5 доллардан 1080,6 млн долларга чейин азайган.

Чет элдик инвестициялардын агымынын төмөндөшү Баткен облусунда, ошондой эле Бишкек жана Ош шаарларында байкалган. Ошол эле учурда инвестициянын өсүшү Жалал-Абад, Ысык-Көл, Нарын, Талас жана Чүй облустарында катталган.

Экономикалык иштин түрлөрү боюнча негизги тике чет өлкөлүк инвестициялар төмөнкүлөргө багытталган:

• өндүрүш – 88,1 млн доллар,
• каржылык ортомчулук жана камсыздандыруу чөйрөсү – 83,9 млн доллар,
• кен казуу – 39,5 миллион доллар,
• маалымат технологиялары – 26,7 млн.

Ошол эле учурда финансы секторуна инвестициялар 6,7 эсеге, тоо-кен тармагына жана IT тармагына – 1,4 эсеге, кайра иштетүү өнөр жайына – 11,1%га өскөн. Дүң жана чекене соодага инвестициялар 8,8%га кыскарган.

Өлкөлөр боюнча алдыңкы инвесторлор Кытай (тике инвестициянын жалпы көлөмүнүн 23%), Түркия (21,6%), Нидерланддар (8,3%) жана Бириккен Араб Эмираттары (2%).

Кытайдан келген инвестиция негизинен өндүрүш жана тоо-кен тармагына, Түркиядан каржы секторуна жана тоо-кен тармагына, Нидерландиядан маалымат технологияларына, БАЭден соода жана транспортко багытталган.

КМШ өлкөлөрүнөн тике инвестициялардын олуттуу өсүшү байкалган – 2,1 эсеге, негизинен Казакстандын жана Россиянын эсебинен.

Жалпысынан алганда, чет өлкөлүк инвестициялардын жалпы көлөмүнүн кыскарышына карабастан, тике инвестициялардын өсүшү оң динамика менен мүнөздөлөт, бул Кыргызстандын экономикасынын негизги секторлоруна инвесторлордун кызыгуусунун жогорулагандыгын айгинелейт.