Министрлер кабинетинин төрагасы Адылбек Касымалиев кыргыз-тажик өкмөттөр аралык кеңешинин биринчи жыйынына катышуу үчүн өлкөгө жумушчу сапар менен келген Тажикстандын премьер-министри Кохир Расулзода менен жолугушту.
«Чек ара маселелерин чечүү – бул чындап эле тарыхый окуя, ал Кыргызстан менен Тажикстандын ортосундагы достук жана жакшы коңшулук мамилелерди өнүктүрүү үчүн бекем пайдубал түзөт. Тажикстан Республикасы менен ар тараптуу кызматташтыкты андан ары өнүктүрүү жана тереңдетүү Кыргыз Республикасынын тышкы саясатынын артыкчылыктуу багыты экенин баса белгилегим келет. 2025-жылы биздин өлкөлөрдүн аракеттери соода-экономикалык, маданий жана гуманитардык кызматташтыкты калыбына келтирүүгө жана күчөтүүгө, чек ара аймактарындагы жашоочулардын социалдык-экономикалык абалын жакшыртууга, ошондой эле эки тараптуу кызматташтыктын бардык тармактарында кыргыз-тажик байланыштарын андан ары өнүктүрүүгө жана тереңдетүүгө багытталат», – деди Премьер-министр.
Адылбек Касымалиев өткөн жылы Кыргызстандын Тажикстан менен болгон соода жүгүртүүсү 36 миллион долларды түзүп, 2024-жылдын ушул мезгилине салыштырмалуу дээрлик 24 эсеге өскөнүн айтты.
Министрлер Кабинетинин Төрагасы эки мамлекеттин башчылары соода жүгүртүүнү 500 миллион АКШ долларына чейин көбөйтүү максатын койгонун белгилеп, бул максатка жетүүгө толук даяр экенин билдирди.
Өз кезегинде Тажикстан Республикасынын Премьер-министри Кохир Расулзода меймандостук жана жылуу тосуп алуу үчүн ыраазычылык билдирип, ар кандай тармактардагы эки тараптуу кызматташтыкты андан ары өнүктүрүү жана бекемдөө үчүн кыргыз-тажик өкмөттөр аралык кеңешинин биринчи жыйынын өткөрүүнүн маанисин белгиледи.
Кохир Расулзода Кыргыз Республикасы менен жакшы коңшулук мамилелерди өнүктүрүү Тажикстандын тышкы саясатынын артыкчылыктуу багыты экенин баса белгиледи.
Ал тажик тараптын эки өлкөнүн лидерлери койгон амбициялуу максаттарды ишке ашырууга даяр экенин билдирди.
Жолугушуунун жүрүшүндө тараптар соода-экономикалык, маданий-гуманитардык жана башка тармактардагы эки тараптуу кызматташтыктын актуалдуу маселелерин талкуулашты.
2026-жылдын 13-февралы, саат 9:11:43