Тышкы иштер министри Жээнбек Кулубаев Орусиядагы мекендештердин кара тизмеден чыгарылышына байланыштуу кайрылуу жасады.

Кайрылууда айтылат

«Урматтуу мекендештер!

Россия Федерациясынын аймагында жүргөн жана ар кандай себептер менен миграциялык мыйзамдарды бузуучулардын реестрине (кара тизмеге) киргизилген Кыргыз Республикасынын жарандарына 2025-жылдын сентябрына чейин алардын укуктук абалын жөнгө салуу жана бул тизмеден чыгуу мүмкүнчүлүгү берилет.

Бул президент Садыр Жапаровдун Россия Федерациясынын Президенти Владимир Путинге мигранттардын документтерин легалдаштыруу мөөнөтүн узартуу өтүнүчү менен расмий кат менен кайрылуусунун аркасында мүмкүн болду. Бул мөөнөт акыркы болуп саналат жана узартылышы мүмкүн эмес.

Бүгүнкү күндө 70 миңдей мекендешибиз кара тизмеде болсо, 3 миңге жакыны гана каттоодон чыга алган.

Урматтуу жарандар, убактыңызды текке кетирбеңиз – аймактык миграция бөлүмдөрүнө же Кыргыз Республикасынын Россиядагы Элчилигине жана консулдук мекемелерине кайрылып, керектүү маалыматтарды тактап, укуктук статусуңузду мыйзамдаштыруу процедурасын баштаңыз.

Биз сиздерди кийинкиге калтырбоого чакырабыз, анткени сентябрга жакын полиция бөлүмдөрүндө, иммиграция кызматтарында, элчиликтерде жана консулдуктарда узун кезектер пайда болуп, өз убагында жетишпей калышыңар мүмкүн.

Эгерде 1-сентябрга чейин жогорудагы каттоодон чыкпасаңыз, депортацияга туш болосуз.

Талаптар абдан мүмкүн – бул бир аз убакытты талап кылат.

Контролдук реестрден чыгаруу үчүн төмөнкү кадамдарды жасоо керек:

– Жергиликтүү миграция бөлүмүнө кайрылыңыз жана контролдук реестрге кирүү себебин тактаңыз.

Эгер сиз манжа изин же медициналык текшерүүдөн өтө элек болсоңуз:

– Москванын тургундары Сахарово миграциялык борборуна кайрылуусу керек;

– региондордун тургундары – Россия Федерациясынын Ички иштер министрлигинин тиешелүү миграциялык бөлүмдөрүнө;

-Эмгек келишимин түзүү негизги талап болуп саналат. Кыргыз Республикасы ЕАЭБге мүчө болгондуктан, бул милдеттүү шарт;

Эмгек келишиминин негизинде:

– миграциялык картанын жана каттоонун жарактуулук мөөнөтү узартылды;

– Каттоо жашаган жери боюнча жүргүзүлөт.

Документтерде кемчиликтер болсо (мисалы, каттоо же эмгек келишиминин мөөнөтү бүтсө) административдик жоопкерчиликке тартылып, 5000-7000 рубль өлчөмүндө айып салынат. Айып төлөнгөндөн кийин документтер легалдаштырууга жатат.

Бул процедуралар үстүбүздөгү жылдын 1-сентябрына чейин аткарылууга тийиш.

Орус тарап ошондой эле ички иштер бөлүмдөрүнүн иштөө убактысын эки саатка узартты. Бул кошумча мүмкүнчүлүктү колдонуңуз.

Урматтуу мекендештер!

“Мөөнөт дагы узартылат” деген үмүт менен бул маселеге кайдыгер мамиле кылбаңыз. Мөөнөтү бүткөндөн кийин “өкмөт жардам берген жок”, “президент келишимге келген жок” деген сыяктуу айыптоолор негизсиз болуп калат.

КР Тышкы иштер министрлиги жарандардын укуктарын коргоого жана мыйзам чегинде мекендештерге жардам көрсөтүүгө ар дайым даяр. Ошону менен бирге өз убагында мыйзамдаштыруу ар бир жарандын жеке милдети экенин эскертебиз”.