Кытайдын Тяньцзинь шаарында Шанхай Кызматташтык Уюмунун (ШКУ) 25-саммити “Шанхай рухун илгерилетүү: ШКУ аракетте” деген ураан астында башталды. Жыйынга 20дан ашык өлкөнүн, анын ичинде ШКУга мүчө бардык 10 мамлекеттин: Кытай, Индия, Орусия, Пакистан, Иран, Казакстан, Кыргызстан, Тажикстан, Өзбекстан жана Беларустун лидерлери катышууда.

Саммиттин ачылышында Кытайдын төрагасы Си Цзиньпин куттуктоо сөзүн сүйлөдү. Ага чейин өлкөнүн лидерлери Тяньцзин шаарында чогуу сүрөткө түшүшкөн.

Жыйында Тяньцзин декларациясына кол коюу, ШКУнун 10 жылдык өнүгүү стратегиясын бекитүү жана коопсуздук, соода, энергетика жана маданий кызматташтык боюнча жыйынтыктоочу документтер болору күтүлүүдө. Ошондой эле Экинчи дүйнөлүк согуштун аякташынын жана БУУнун түзүлгөндүгүнүн 80 жылдыгына арналган билдирүүлөр кабыл алынат.

ШКУ “Шанхай бештигинин” негизинде түзүлүп, анын курамына Кытай, Орусия, Казакстан, Кыргызстан жана Тажикстан кирген, кийинчерээк Өзбекстан да кошулган. Бүгүнкү күндө уюм 10 мүчө-өлкөнү, 2 байкоочуну жана Азия, Европа жана Африкадан 14 диалог боюнча өнөктөштү бириктирет.

ШКУ дүйнө аймагынын 24%ке жакынын жана дүйнө калкынын 42%ын камтыйт, ага мүчө мамлекеттер дүйнөлүк ИДПнын төрттөн бир бөлүгүн түзөт. Жыйырма жылдын ичинде сооданын көлөмү дээрлик 100 эсе өстү. 2024-жылы Кытайдын ШКУнун мүчөлөрү, байкоочулары жана диалог боюнча өнөктөштөрү менен соодасы рекорддук көрсөткүчкө жетип, 890 миллиард долларга жетип, өлкөнүн жалпы тышкы соода жүгүртүүсүнүн 14,4% түздү.

ШКУга мүчө мамлекеттердин башчыларынын буга чейинки саммити 2024-жылдын июль айында Казакстанда өтүп, анда энергетика, коопсуздук, каржы жана маалымат коопсуздугу боюнча 25 стратегиялык документ кабыл алынган.