Кытайдын түндүгүндө нөшөрлөп жааган жамгыр катуу сел жана жер көчкүлөрдү жаратты. Акыркы маалыматтарга караганда, табият кырсыгынан кеминде 40 адам каза болду. Пекинде эле 30 тургун каза тапты, алардын 28и тоолуу Миюнь аймагында, дагы экөө Янцинде болгон. Кооптуу аймактардан 80 миңден ашуун адам эвакуацияланды.

Эң көп жабыр тарткан аймактар баш калаанын чет жакалары болду: Фангшан, Хуайру жана өзгөчө Миюнь, бул жерде ошол эле аталыштагы суу сактагычтагы суунун деңгээли 1959-жылы түзүлгөндөн бери эң жогорку чегине жетти. Борбордун кээ бир райондорунда бир нече күндүн ичинде 800 ммге чейин жаан-чачын катталган – мындай көрсөткүчтөр экстремалдуу деп эсептелет. Жолдордун ондогон тилкелери бузулуп, 136 айыл электр жарыгысыз калган.

Суу каптоо коңшу Хэбэй провинциясына да таасирин тийгизип, Чэндэ шаарына жакын жердеги айылда жер көчкү жүрүп, сегиз киши каза болуп, төртөө дайынсыз жоголду.

Кырсыктын шартында Кытайдын төрагасы Си Цзиньпин жергиликтүү бийликти тез арада чара көрүүгө жана жарандардын өмүрүн жана мүлкүн коргоого чакырды. Ал тез арада эвакуациялоо, куткаруу кызматтарын мобилизациялоо, гидротехникалык курулуштарды көзөмөлдөө зарылдыгын белгиледи. Кытай Эл Республикасынын Мамлекеттик кеңешинин премьери Ли Цян аба ырайына мониторинг жүргүзүүнү жана өзгөчө кырдаалдарга даярдыкты күчөтүүнү тапшырды.

Өзгөчө кырдаалдар министрлиги өзгөчө кырдаалдардын алдын алуунун эң жогорку деңгээлин – төртүнчү даражасын киргизди. Тургундарга дарыяларга жакын болбоону жана сактык чараларын көрүү сунушталат. Кырсык болгон аймакка жардам көрсөтүүнү координациялоо үчүн жумушчу топтор жөнөтүлдү.