МОСКВА, 25-сентябрь, 2025-жыл — «Караван инфо» агентствосу.Беларусь президенти Александр Лукашенко иш сапары менен Москвага келип, анын учагы Внуково аэропортуна конду.

25-26-сентябрда боло турган иш сапарынын алкагында Лукашенко Орусиянын президенти Владимир Путин менен жолугат. Эки тараптуу кызматташтыктын негизги маселелери жана актуалдуу эл аралык темалар талкууланат.

Сүйлөшүүлөрдөн тышкары Беларусь мамлекет башчысы “Жаңы технологиялык тартиптен жаңы дүйнө таанымына” деген ураан астында өтүүчү Глобалдык атомдук форумга катышат.

Форум өзөктүк өнөр жайын өнүктүрүү жана инновациялык технологияларды ишке киргизүү маселелерин талкуулоо үчүн илимий коомчулуктун, өнөр жай компаниялардын жана саясатчылардын башын бириктирет.

Глобалдык атомдук форум өзөктүк энергетикадагы учурдагы тенденцияларды, эл аралык кызматташтыкты жана жаңы технологияларды ишке ашырууну талкуулоо үчүн өткөрүлөт.

Россия менен Беларусь президенттеринин жумушчу сапарлары салттуу түрдө эки тараптуу байланыштарды бекемдеген экономикалык, энергетикалык жана технологиялык демилгелерди талкуулоо менен коштолот.

Архив сүрөт