Кыргыз Республикасынын Жаратылыш ресурстары, экология жана техникалык көзөмөл министрлиги тарабынан «Жер участокторун которуунун (трансформациялоонун) жол-жоболорун жөнөкөйлөтүү максатында министрлер кабинетинин айрым чечимдерине өзгөртүүлөрдү киргизүү тууралуу» министрлер кабинетинин токтомунун долбоору иштелип чыкты. Документ жер тилкелерин трансформациялоо процедурасын жөнөкөйлөштүрүү жана стандартташтыруу, документтерди кароо мөөнөтүн кыскартуу жана жерди сарамжалдуу пайдаланууну камсыз кылууга багытталган.

Долбоордо Маданият, маалымат жана жаштар саясаты министрлигинин штаттык санын 7 бирдикке көбөйтүүгө өзгөчө көңүл бурулуп, бул тарыхый-маданий мурастарды коргоо боюнча функцияларды ыкчам аткарууга мүмкүндүк берет. Жаңы кызматкерлердин эмгек акысына жылына 2,5 миллион сомго жакын каражат бөлүү пландаштырылууда. Чыгашалардын маанилуу статьясы болуп иш сапарларга жана жабдууларды сатып алууга — кошумча 2,5 миллион сом эсептелет, бул тарых жана маданият эстеликтерин коргоо инспекциясынын ишинин натыйжалуулугун бир кыйла жогорулатат.

Ошентип, бул чаралардын жалпы бюджети жылына болжол менен 5 миллион сомду түзөт, бул өлкөнүн бардык аймактарын камтууну камсыз кылат жана зарыл корутундуларды даярдоо үчүн талап кылынган убакытты азыркы 3-6 айдан кыйла натыйжалуу мөөнөткө чейин кыскартат.

Долбоордо ошондой эле жер тилкелерин трансформациялоо жол-жоболорун жөнөкөйлөтүү, шаар куруу документтерине дифференцияланган мамиле кылуу, мыйзам бузуулар болгон учурда жерлерди баштапкы абалына кайтаруу механизмин киргизүү, документтерди кароонун мөөнөтүн 10дон 5 жумушчу күнгө чейин кыскартуу каралган.

Суу чарба жана айыл чарба министрлиги жергиликтүү администрациялар менен бирдикте айыл чарба потенциалын жана азык-түлүк коопсуздугун сактоо максатында трансформациялоого жатпай турган аймактарды аныктоо үчүн айыл чарба жерлерине талдоо жүргүзөт.

Бул чаралар өлкөдө жерди пайдалануунун ачыктыгын, натыйжалуулугун жана туруктуулугун жогорулатууга, ошондой эле маданий мурастарды коргоону күчөтүүгө жана Кыргыз Республикасындагы азык-түлүк коопсуздугун колдоого багытталган.