Тышкы иштер министри Жээнбек Кулубаевдин чакыруусу боюнча Россия Федерациясынын Тышкы иштер министри Сергей Викторович Лавров 2025-жылдын 28-29-июнунда расмий сапар менен Кыргыз Республикасына келди.

Сүйлөшүүлөрдүн жүрүшүндө эки өлкөнүн тышкы иштер министрликтеринин башчылары эки тараптуу күн тартибиндеги актуалдуу маселелердин кеңири чөйрөсүн, анын ичинде саясий, соода-экономикалык, инвестициялык жана маданий-гуманитардык чөйрөлөрдө кызматташуунун артыкчылыктуу багыттарын кылдат талкуулашты.

Тараптар ошондой эле буга чейинки жогорку деңгээлдеги сапарлардын жүрүшүндө жетишилген макулдашууларды ишке ашыруунун жүрүшүн карап чыгышты жана мындан ары да кыргыз-орус мамилелерин сапаттык жаңы деңгээлге чыгаруу үчүн биргелешкен күч-аракеттерди жумшоого даяр экендиктерин билдиришти.

Эл аралык жана аймактык уюмдардын, анын ичинде БУУ, КМШ, ЕАЭБ, ШКУ, ЖККУ жана башка интеграциялык бирикмелердин алкагында кызматташууну чыңдоо маселелерине өзгөчө көңүл бурулду.

Сүйлөшүүлөр салттуу ачык маанайда, өз ара түшүнүшүү жана ишеним духунда өттү. Эки тарап тең өнөктөштүктү мындан ары да бекемдөөгө, практикалык кызматташууну кеңейтүүгө жана буга чейин жетишилген натыйжаларды жогорулатууга умтуларын ырасташты.

Саясий диалогдун жогорку интенсивдүүлүгү, анын ичинде эки өлкөнүн мамлекет башчыларынын, парламенттеринин жана өкмөттөрүнүн деңгээлиндеги үзгүлтүксүз байланыштар өзүнчө белгиленди.

Жолугушуунун жүрүшүндө эки тараптуу кызматташуунун келечектүү багыттары аныкталып, үстүбүздөгү жылга пландаштырылган алдыдагы жогорку деңгээлдеги иш-чаралардын графиги жана күн тартиби такталды.

Тышкы иштер министри Жээнбек Кулубаев да миграция боюнча күн тартибиндеги маселелерге көңүл буруп, Россия Федерациясынын аймагында жайгашкан кыргыз жарандарынын укуктарын жана кызыкчылыктарын коргоонун маанилүүлүгүн белгиледи.