26-июлда Транспорт жана коммуникациялар министри Абсаттар Сыргабаев Жалал-Абад облусуна иш сапары менен барды.

Иш сапардын алкагында башкармалыктын башчысы Базар-Коргон – Арстанбап жана Арстанбап – Кызыл-Үңкүр багыттары боюнча жол куруу иштеринин жүрүшү менен таанышты.

Учурда Базар-Коргон-Арстанбап жолунун 6 чакырым тилкесинде асфальт төшөө иштери аяктап, тилкеси пайдаланууга берилди. Арстанбап-Кызыл-Үңкүр жолунда жолду кеңейтүү жана суу өткөргүчтөрдү орнотуу иштери кызуу жүрүп жатат.

Министр облустун туризм инфраструктурасын өнүктүрүү үчүн жол иштерин сапаттуу жана өз убагында бүтүрүүнүн маанилүүлүгүн белгиледи. Ал Базар-Коргон-Арстанбап жолунун калган 33 чакырымына асфальттын биринчи катмарын төшөп бүтүрүүнү тапшырды.

Белгилей кетсек, бул магистралдар туристтер көп каттаган маанилүү транспорттук артерия болуп саналат.