Министрлер Кабинетинин Төрагасы Адылбек Касымалиев альпинист Асел Байбагышеваны дүйнөнүн эң бийик чокусу Эверестти ийгиликтүү багындырышы менен видеобайланыш аркылуу куттуктады. Адылбек Касымалиев Асел Байбагышеванын эрдигине, кайраттуулугуна жана жогорку кесипкөйлүгүнө чын жүрөктөн суктануусун билдирди.

Анын өзгөчө жетишкендиги Улуу Ата Мекендик согуштагы Жеңиштин 80 жылдыгына чыныгы белек болгонун жана чечкиндүүлүк менен кайраттуулуктун жаркын үлгүсү экенин баса белгиледи. Министрлер кабинетинин башчысы Эверестти 54 саатта багындыруу альпинисттин жеке жеңиши гана эмес, бүтүндөй өлкө үчүн маанилүү окуя экенин белгиледи.

"Президенттин, Министрлер Кабинетинин жана жеке өзүмдүн атымдан бул тарыхый бийиктикке байланыштуу чын жүрөктөн чыккан куттуктоолорубузду кабыл алыңыз! Сиздин ийгилигиңиз кыргызстандыктардын кандай гана бийиктикке жетүү мүмкүнчүлүгүн көрсөткөн, жынысына карабастан ар бир адам үчүн шыктандыруучу үлгү. Бул биздин өлкөбүз үчүн чоң сыймыктануу сезимин жаратат", – деди Адылбек Касымалиев.

Ошондой эле Асел Байбагышева бийиктикке чыккандан кийин өзүн кандай сезип жатканын сурап, ага ден соолук, жаңы чокуларды багындырышын каалады. Асел Байбагышева министрлер кабинетинин төрагасына жылуу сөздөрү жана анын жетишкендигин жогору баалагандыгы үчүн ыраазычылык билдирип, Эверестте Кыргызстандын атынан чыгуу өзгөчө жоопкерчиликти сезип жатканын баса белгиледи. Белгилей кетсек, Асел Байбагышева Эверестти багындырган биринчи жана жалгыз кыргызстандык альпинист кыз. Ал 2025-жылдын 11-майында Кыргызстандын желегин желбиретип саммитке ийгиликтүү чыгып, 2025-жылдын 12-майында базалык лагерге аман-эсен кайтып келген.

Асел Байбагышева багындырган чокулардын ичинен Ленин чокусу (7134 м), Хан-Теңири (7010 м), Победа чокусу (7439 м), Эльбрус (5642 м) жана башка чокуларды да белгилей кетүү керек.