Минск шаарында Советтер Союзунун Баатыры Жумаш Асаналиевдин эстелигинин алдында Улуу Ата Мекендик согуштагы Жеңиштин 80 жылдыгына жана Белоруссияны бошотуу үчүн салгылашкан кыргызстандык жоокерлерди эскерүү митинг-реквиеми өттү.

Митингди КР элчилиги жана Минск шаарынын Октябрь районунун администрациясы уюштурган. Иш-чарага Беларусь Республикасынын Тышкы иштер министрлигинин өкүлдөрү, КМШга мүчө-мамлекеттердин дипломатиялык өкүлчүлүктөрүнүн жетекчилери жана кызматкерлери, КМШнын Аткаруу комитетинин жана ЕАЭБ сотунун өкүлдөрү, Минск шаарында жашаган кыргызстандыктар, Октябрь районунун коомдук уюмдарынын, ишканаларынын жана жаштар кыймылынын өкүлдөрү катышты.

Элчи Эрбол Султанбаев өз сөзүндө Улуу Ата Мекендик согуш жылдарында фашисттик баскынчыларга каршы күрөштө кыргызстандык жоокерлердин кошкон салымын белгилеп, согуштун оор жылдарын жана жалпы Жеңишти эстеп калганы үчүн бардык белорус элине ыраазычылык билдирди.

Октябрь районунун чыгармачылык топтору ардагерлер тууралуу ырларды окуп, согуш жылдарындагы ырларды аткарышты. Митингдин соңунда чогулгандар Жумаш Асаналиевдин эстелигине гүл коюшту.