Шавкат Мирзиёев республиканын Дүйнөлүк соода уюмуна (ДСУ) кирүү маселеси боюнча калган тогуз өлкө менен эки тараптуу сүйлөшүүлөрдү ушул жылдын аягына чейин бүтүрүүнү тапшырды. Белгилей кетсек, 2023-жылдан бери Өзбекстандын Дүйнөлүк соода уюмуна кирүүсү боюнча жумушчу топтун төрт отуруму өтүп, анда 500дөн ашык маселе каралган. 33 мамлекет менен рынокко чыгуу боюнча сүйлөшүүлөр жүргүзүлүп, анын 24ү ийгиликтүү аяктаган. Улуттук мыйзамдарды ДСУнун талаптарына ылайык келтирүү контекстинде 13 мыйзам, 10 Президенттин жарлыгы жана токтому, ошондой эле башка ченемдик укуктук актылар кабыл алынган.

«Үстүбүздөгү жылдын аягына чейин калган 9 мамлекет менен эки тараптуу сүйлөшүүлөрдү аяктоо, жумушчу топтун дагы эки отурумун өткөрүү жана жумушчу топтун корутунду докладынын долбоорун даярдоону аяктоо, ошону менен Өзбекстандын ДСУнун алкагындагы эл аралык милдеттенмелерин камсыздоо тапшырмасы берилди», – деди ал.— деп айтылат мамлекет башчынын басма сөз кызматы билдирүүсүндө.

Президент ошондой эле 15ке жакын ченемдик укуктук актыларды кабыл алууну тездетүү зарылдыгын белгиледи. Анын ичинде Олий Мажлистин Мыйзам чыгаруу палатасы менен тыгыз кызматташтыкта “Тамак-аш азыктарынын сапаты жана коопсуздугу жөнүндө” жана “Коргоо чаралары, демпингге каршы жана компенсациялык алымдар жөнүндө” мыйзамдардын жаңы редакцияларын иштеп чыгуу кирет. Өзгөчө көңүл техникалык жөнгө салуу, санитардык, фитосанитардык жана ветеринардык чөйрөлөрдөгү реформалардын маанилүүлүгүнө, ошондой эле бул багыттардагы кадрларды даярдоонун сапатын жогорулатууга бурулду. Өзбекстан ДСУга кирүү үчүн 1994-жылы арыз берген жана кирүү процессин 2026-жылы Камерунда өтө турган ДСУнун 14-министрлер конференциясына чейин бүтүрүүнү пландоодо.