Мамлекеттик салык кызматынын төрагасы Алмамбет Шыкмаматов фармацевтикалык бизнестин өкүлдөрү менен жолугушуу өткөрдү, анын жүрүшүндө бул тармактагы салык салуунун актуалдуу маселелери талкууланды.

Иш-чарага Салык кызматынын жетекчилиги, КРнын Саламаттык сактоо министрлигинин жана фармбизнестин өкүлдөрү катышты.

Жолугушууда электрондук товардык-транспорттук коштомо кагаздарды колдонуу маселелери талкууланды. Фармацевтикалык сектордун өкүлдөрү ЭТТКны киргизүүдө пайда болгон кыйынчылыктар тууралуу айтышты.

Алмамбет Шыкмаматов ЭТТКны колдонуу импорттоочулар, өндүрүүчүлөр жана ири соода тармактары үчүн милдеттүү бойдон кала тургандыгын баса белгиледи.

Ошондой эле дары-дармек каражаттарын эсепке алууну жөнөкөйлөтүү үчүн ЭТТКны “1С-Бухгалтерия” системасы жана дарылардын электрондук маалымат базасы (ДЭМБ) менен интеграциялоо каралууда.

“Чакан жана орто бизнес үчүн дарылардын электрондук маалымат базасын “1С-Бухгалтерия” жана ЭТТК менен бириктирүүнү камтыган чечим иштелип чыгууда, бул ишкерлерге маалыматтарды бирдиктүү платформада толтурууга мүмкүндүк берет. 1-мартка чейин бул чечимди иштеп чыгуу үчүн мөөнөтүбүз бар”, – деп белгиледи Салык кызматынын башчысы.

Мындан сырткары, салык жеңилдиктери жана салык салуудагы өзгөрүүлөр талкууланды. Тактап айтканда, мыйзамдарга жашоо үчүн маанилүү дары-дармек каражаттарын КНСтен бошотууну караган түзөтүү даярдалууда.

Салык кызматынын башчысы гемодиализ кызматын көрсөткөн уюмдар үчүн бирдиктүү салыктын негизинде салык салуунун жөнөкөйлөтүлгөн режимине өтүү мүмкүндүгүн белгиледи.

Алмамбет Шыкмаматов фармацевтика тармагындагы ишкерлер арасында салык сабаттуулугун жогорулатуу зарылдыгына басым жасады. Бул мамлекеттин кызыкчылыктарын сактоо жана бизнес үчүн ыңгайлуу шарттарды түзүү үчүн маанилүү шарт болуп саналат.

Салык кызматынын төрагасы Салык кызматы жагымдуу ишкердик чөйрөнү, анын ичинде фармацевтикалык бизнестин өкүлдөрү үчүн бардык күч-аракетин жумшап жаткандыгын баса белгиледи.

Жолугушуу Кыргызстанда салык жол-жоболорунун ачыктыгын жогорулатуу жана фармацевтика тармагын өнүктүрүүнү колдоо үчүн натыйжалуу чечимдерди иштеп чыгуу максатында түшүндүрүүнү улантуу жөнүндө макулдашуу менен аяктады.

Ақпарат көзі: сайт https://caravan-info.kg/