БОРБОР АЗИЯ, 12-май, 2025-жыл – Кербен маалыматы.Талибандын суу ресурстары жана энергетика министри Абдул Латиф Мансур Өзбекстанда өтө турган 5-эл аралык энергетикалык конференцияга катышуу үчүн Ташкентке барды. Иш-чара 2025-жылдын 13-майынан 15-майына чейин өтөт.

Талибандын Энергетика министрлиги дүйшөмбү күнү, 12-майда билдиргендей, «Туруктуу энергия үчүн аймактык кызматташтык» деген аталышта өтүп жаткан конференция энергетика тармагындагы кызматташтык стратегияларын, өнүккөн энергетика рыногун түзүү жана жашыл экономикага өтүү маселелерин талкуулоо үчүн аянтча түзөт.

Ведомствонун билдирүүсүндө конференциянын максаты энергетика тармагындагы аймактык кызматташтыкты чыңдоо, биргелешкен долбоорлорго инвестициялык мүмкүнчүлүктөрдү баалоо, энергетика рыногун өнүктүрүү жана экологиялык таза технологияларды ишке ашырууда тажрыйба алмашуу экени баса белгиленет.

Талибан ошондой эле министр иш-чаранын жүрүшүндө негизги маселелерди, анын ичинде энергетика тармагындагы кызматташтыкты кеңейтүү, инновациялык технологияларды киргизүү жана тармактагы учурдагы кыйынчылыктарды жеңүү маселелерин чечерин билдирди.

Белгилей кетсек, конференцияга Өзбекстан, Казакстан, Түркмөнстан, Орусия жана башка аймактагы мамлекеттерден, Атомдук энергия боюнча эл аралык агенттик, Дүйнөлүк банк сыяктуу эл аралык уюмдардын өкүлдөрү катышат.

Сүрөт: Караван Инфонун өнөктөштөрү