Москва, 11-август, 2025-жыл — IA Кербен инфо.Орусия Израилдин Газа шаарына толук көзөмөл орнотуу жана Палестина анклавындагы аскердик операциясын кеңейтүү чечимин кескин сынга алды.

Бул тууралуу Россия Федерациясынын БУУдагы туруктуу өкүлүнүн милдетин аткаруучу Дмитрий Полянский Коопсуздук кеңешинин чукул жыйынында билдирди.

«Израилдин жетекчилигинин бул аракеттери эл аралык укукту одоно бузуп, эл аралык коомчулуктун чакырыктарына да, Коопсуздук кеңешинин чечимдерине да этибарсыздыкты көрсөтөт», – деп белгиледи дипломат Израилдин аскердик-саясий кабинетинин чечимин комментарийлеп.

Полянский ХАМАС кыймылын талкалоо жана Газа тилкесине толук көзөмөл орнотуу максатында аскерлерди киргизүү планы палестин-израилдик жаңжалды эки мамлекет жолу менен чечүү келечегине олуттуу сокку ураарын баса белгиледи.

Аскердик операцияны кеңейтүү жана Газаны көзөмөлгө алуу чечими Израилдин премьер-министри Биньямин Нетаньяхунун сунушу менен 8-августтун кечинде кабыл алынган.

Газадагы кырдаал Жакынкы Чыгыштагы чыңалуунун негизги факторлорунун бири бойдон калууда. Эл аралык коомчулук сабырдуулукка жана Израил менен Палестинанын ортосундагы жаңжалды тынчтык жолу менен чечүү жолдорун издөөгө бир нече ирет үндөгөн. Орусия салттуу түрдө эки тараптуу сүйлөшүүлөрдү жана эл аралык укуктун принциптерин сактоону жактайт.

Бүгүн, Израилде, бир нече күндөн бери бул маселе боюнча, Газадагы палестиналыктарды геноцидге алып келген аскердик операцияларды токтотууну талап кылган массалык нааразылык акциялары өтүп жатат.

Расмий маалыматтарга караганда, Израилдин аскерлери Газада бүткүл мезгил ичинде 60 миңден ашуун адамды өлтүрсө, бейрасмий маалыматтарда бул көрсөткүч 100 миңден ашкан.

Сүрөт: Wikipedia