МОСКВА, 29-май, 2025-жыл — Кербен инфо.Орусиянын коргоо министри Андрей Белоусов Ооганстанда жайгашкан экстремисттик топтор Борбор Азия өлкөлөрүнүн коопсуздугуна негизги коркунуч экенин билдирди. Бул тууралуу ал шаршемби күнү өткөн Жамааттык коопсуздук келишим уюмунун (ЖККУ) коргоо министрлер кеңешинин жыйынында билдирди.

Коргоо министрлигинин башчысынын айтымында, учурда Ооганстанда 20дан ашык экстремисттик уюм, алардын жалпы саны 15 миңден ашуун согушкер бар. Белоусов бул куралдуу түзүлүштөрдүн кошуна мамлекеттердин аймагына кирип кетүү коркунучу өсүп жатканын, бул ЖККУга мүчө өлкөлөрдөн кыраакылыкты талап кылып жатканын баса белгиледи.

Министр ошондой эле Жакынкы Чыгыштагы туруксуздук кырдаалды курчутуп жатканын белгиледи: бул аймактан айрым согушкерлер Ооганстанга жана башка Борбор Азия өлкөлөрүнө которулуп, чыңалууну күчөтүүдө.

Буга байланыштуу Белоусов ЖККУ күчтөрүн потенциалдуу коркунучтарга өз убагында жооп кайтаруу үчүн максималдуу күжүрмөн даярдыкты сактоого чакырды.

Буга чейин Ооганстандагы оппозициялык кыймылдардын – Ахмад Масуд жетектеген Улуттук каршылык көрсөтүү фронтунун жана Ясин Зия жетектеген Эркиндик фронтунун өкүлдөрү да Ооганстанда жигердүү аракеттенип жаткан 20дан ашык террористтик топтор бар экенин билдиришкен.

Сүрөт: Караван Инфонун өнөктөштөрү