Мичиган мамлекеттик университетинин (АКШ) ардактуу профессору Стивен Пуэпке жана Азия борборунун директору, профессор Цзягуо Ци ОшМУда болушту.

Конокторду университеттин окуу иштери боюнча проректору Руслан Арапбаев, илимий иштер боюнча проректору Элзарбек Эшаров, рейтинг бөлүмүнүн башчысы Максатом Тотобаев жана эл аралык байланыштар департаментинин директору Сайкал Ибраимова кабыл алышты. Тараптар кызматташуу маселелери боюнча пикир алышты.

Цзягуо Ци ОшМУга Азия борборунун алкагында эл аралык илимий кызматташтыкты өнүктүрүү, энергетика, азык-түлүк, суу маселелери боюнча изилдөөлөрдү жүргүзүү, биргелешкен долбоорлорду жазуу, эл аралык ири иш-чараларды өткөрүү сунуштары менен келгенин билдирди.

Келечекте эки университеттин кызматташуусу боюнча иштер улантыла тургандыгы белгиленди. Өз кезегинде конокторго ОшМУнун ишмердүүлүгү тууралуу маалымат берилди.

Мичиган мамлекеттик университети Кошмо Штаттардагы эң ири жана алдыңкы мамлекеттик университеттердин бири. 50 000ден ашык студенттер төмөнкү тармактарда билим алышат: айыл чарба, инженерия, медицина, экология жана эл аралык мамилелер.

Университеттин Азия борбору университетке өнөктөштөрдү аныктоо, биргелешкен каржылоо стратегияларын иштеп чыгуу жана инвестицияларды тартуу аркылуу комплекстүү изилдөөлөрдү жана жаңы академиялык программаларды иштеп чыгууга жардам берет.

Учурда борбордун Борбордук Евразия, Чыгыш, Түштүк жана Түштүк-Чыгыш Азияда тамак-аш, айыл чарба, саламаттыкты сактоо, айлана-чөйрөнү коргоо, суу жана энергетика тармагында кызматташкан 27 мүчөсү бар.