9-май күнү Ош шаарында Улуу Жеңиштин 80 жылдыгына карата майрамдык иш-чаралар өткөрүлдү. Бул тууралуу КР Коргоо министрлиги билдирди.

Расмий маалыматка караганда, майрам Ош шаарынын борбордук аянтында өттү. Иш-чарага Коргоо министринин орун басары – Түштүк-батыш оперативдүү командачылыгынын колбашчысы полковник Алмазбек Карасартов, КР Президентинин Ош облусундагы ыйгарым укуктуу өкүлүнүн биринчи орун басары Курманбек Айтибаев, Ош шаарынын мэри Жеңишбек Токторбаев, ошондой эле Куралдуу күчтөрдүн ардагерлери, шаар тургундары жана ардагерлери катышты.

Иш-чаранын алкагында «Өчпөс от» мемориалдык комплексине гирлянда коюлуп, Ош шаардык маданият башкармалыгы тарабынан майрамдык концерт уюштурулду.

Ошондой эле Токтогул Сатылганов атындагы эс алуу багында ардагерлер үчүн «Аскердик талаа ашканасы» уюштурулуп, келген коноктор салттуу жоокерлердин тамак-ашы менен сыйланды.

Эске сала кетсек, Улуу Ата Мекендик согушта Ош шаарынан 14621 адам чакырылып, анын ичинен 3118 жоокер курман болсо, 401 аскер кызматкери дайынсыз жоголгондордун тизмесинде.