Пекин, 17-июль, 2025-жыл – Караван Инфо маалымат агенттиги.Шанхай Кызматташтык Уюмунун (ШКУ) Пекиндеги штаб-квартирасында ШКУга мүчө-мамлекеттердин тышкы иштер министрликтеринин маалымат кызматтарынын жылдык консультациялары өттү. Иш-чарага Казакстан Республикасынын Тышкы иштер министрлигинин Эл аралык маалымат комитетинин төрагасы Айбек Смадияров катышты.

Консультациялардын жүрүшүндө ШКУнун катчылыгынын өкүлдөрү өткөн жылдагы маалымат иштеринин жыйынтыгын чыгарышты. Катышуучулар биргелешкен долбоорлорду ишке ашыруу боюнча тажрыйба алмашып, расмий материалдарды жайылтууда ачык-айкындуулуктун жана эффективдүүлүктүн маанилүүлүгүн баса белгилешти.

Айбек Смадияров белгилегендей, «мазмунду координациялоо жана негизги билдирүүлөрдү синхрондоштуруу бизге Уюмдун ичиндеги ишенимди бекемдөөгө жана эл аралык аренада бирдиктүү маалымат фронтун түзүүгө мүмкүндүк берет». Ал кытай тарапка жана ШКУнун катчылыгына иш-чараны жогорку деңгээлде уюштургандыгы жана маалыматтык кызматташтыкты бекемдөө үчүн конструктивдүү платформаны түзгөндүгү үчүн ыраазычылык билдирди.

Кытай тарап ШКУга учурдагы төрагалыгынын алкагында медиа демилгелерине сереп салып, ошондой эле Уюмга мүчө-мамлекеттердин мамлекет башчыларынын Тяньцзин шаарында өтө турган саммитин чагылдыруу планын сунуштады. ШКУга мүчө-мамлекеттердин Тышкы иштер министрлигинин тиешелүү бөлүмдөрүнүн жетекчилери мультимедиялык берүүлөрдүн жаңы форматтарын киргизүүнү жана Уюмдун санариптик платформаларда катышуусун күчөтүүнү сунушташты.

Казак дипломаты Айбек Смадияров ШКУнун маалымат күн тартибине жаш журналисттерди жана блоггерлерди активдүү тартуу зарылдыгын белгиледи. Бул аудиториянын чөйрөсүн кеңейтүүгө жана жаштар арасында Уюмдун ишмердүүлүгүнө туруктуу кызыгууну калыптандырууга көмөктөшөөрүн баса белгиледи.

Ошондой эле маалыматтык өз ара аракеттенүүнүн негизги багыттары боюнча пикир алмашуу болду. Айрыкча “Шанхай рухунун” принциптерин биргелешип колдоого жана чөлкөм өлкөлөрүндөгү жалган маалыматка каршы күрөшүүгө өзгөчө көңүл бурулду.

Жыйындын соңунда катышуучулар консультациялар протоколуна кол коюшту, анда маалыматтык кызматтардын мындай жолугушуулары негизги тышкы саясий окуяларды чагылдырууда макулдашылган ыкмаларды иштеп чыгуу жана Уюмдун бирдиктүү маалымат мейкиндигин мындан ары чыңдоо үчүн маанилүү аянтча болуп кызмат кылаарын баса белгилешти.

Фото: Казакстан Республикасынын ТИМи