Президент Садыр Жапаров бүгүн, 5-майда Кыргызстан элин Кыргыз Республикасынын Конституция күнү менен куттуктады.

Мамлекет башчынын куттуктоосу:

«Урматтуу кыргызстандыктар!

Сиздерди Кыргыз Республикасынын Конституция күнү менен чын дилимден куттуктайм!

5-май Конституциябыздын кабыл алынган күнү эле эмес, ар дайым адилеттикти жактап келген элибиздин бийик духун, жаркын келечекке бекем ишенимибизди эске салган маанилүү күн.

Маалым болгондой, Конституция жөн эле беренелердин жыйындысы эмес, элибиздин дүйнө таанымын, ой жүгүртүүсүн чагылдырган, ошол эле учурда күчтүү, өнүккөн Кыргызстандын келечегин аныктаган негизги документ.

Бүгүнкү күндө Конституциябыздан шыктануу менен биз башкаруу, экономика же жарандарыбызды колдоо болобу, бардык тармактарга жаңы ыкмаларды киргизип, жаңы билимге, алдыңкы технологияларга жана тажрыйбага умтулуп жатабыз. Бул биз так, тайманбас, туура жана татыктуу жол менен бара жатканыбызды билдирет.

Кыргыз эли өзгөрүүдөн коркпогон, өзүнө, мамлекетине ишенген куттуу эл! Биз элибиздин көп кылымдык тарыхын, анын бай маданиятын жана баалуулуктарын эч качан унутпайбыз.

Ал эми бүгүн биз кайсы жолго түшүүнү билебиз, өлкөбүздүн өнүгүшүнө ишенебиз.

Урматтуу мекендештер!

Дагы бир жолу Кыргыз Республикасынын Конституция күнү менен куттуктайм.

Конституция күнү ар дайым адилеттүү жана гүлдөгөн Кыргызстанды курууда ар бир кадамдын, ар бир чечимдин маанилүүлүгүн эскертип турсун.

Биздин Конституциябыз ар дайым чечимдерибиздин негизи болсун.

Мамлекетибиз чыңдалып, элдин бийликке болгон ишеними артып, Кыргызстан жаңы бийиктиктерге ишенимдүү кадам таштай берсин!”