МОСКВА, 1-октябрь, 2025-жыл — Караван инфо агентствосу.Орусиянын президенти Владимир Путин Кытайдын төрагасы Си Цзиньпинге Кытай Эл Республикасынын негизделгенинин 76 жылдыгына карата куттуктоо катын жолдоду.

Кремлдин веб-сайтында жарыяланган телеграммасында ал эки тараптуу мамилелердин "болуп көрбөгөн жогорку деңгээлин" баса белгилеген.

«Орусия-кытай мамилелери болуп көрбөгөндөй жогорку деңгээлде — муну биздин жакында эле Тяньцзинь менен Пекиндеги кылдат жана конструктивдүү байланышыбыз толук тастыктады», — деп айтылат куттуктоодо.

Путин жетишилген макулдашуулардын ишке ашырылышы эки өлкөнүн кызыкчылыктарына жооп берген жана көп уюлдуу дүйнөлүк тартипти бекемдеген түрдүү тармактарда жаңы биргелешкен долбоорлорго мүмкүнчүлүктөрдү ачарын белгиледи.

Россиянын президенти Кытай социалдык-экономикалык жана илимий-техникалык чөйрөдө ишенимдүү өнүгүп, дүйнөлүк аренада позициясын бекемдеп, глобалдык көйгөйлөрдү чечүүгө олуттуу салым кошуп жатканын баса белгиледи.

Сөзүнүн аягында Путин Си Цзиньпинге чың ден соолук, өкмөттүк жана партиялык ишине ийгиликтерди, ал эми бардык кытай жарандарына бакыт жана гүлдөп өнүгүү каалады.

Сүрөт: Ачык булактар