21-июлда Кыргыз Республикасынын Президенти Садыр Жапаров менен Монголиянын Президенти Ухнаагийн Хурелсухтун өлкөгө жасаган мамлекеттик сапарынын алкагында сүйлөшүүлөрү өттү.

Тараптар эки тараптуу кызматташуунун негизги багыттарын, анын ичинде саясат, соода-экономика, транспорт жана айыл чарба тармагын талкуулашты. Санариптештирүү, маданий-гуманитардык байланыштарды жана туризмди өнүктүрүүгө өзгөчө көңүл бурулду.

Садыр Жапаров өз сөзүндө Кыргызстан менен Монголия тарыхый жактан достук байланыштары менен байланышкан мамлекеттер экенин, анын тамыры байыртадан бери келерин баса белгиледи.

«Бизди миң жылдык көчмөндөрдүн салттары, руханий баалуулуктары жана жаратылышка аяр мамилеси бириктирип турат.

Биз кылымдар бою өзүнүн бай маданий мурасын түзүп, аны биздин аймактын чегинен алыска жайып келген элдердин, көчмөндөрдүн улуу цивилизациясынын урпактарыбыз.

«Боз үйдө, кийизден, эпосто, көчмөн турмушта бири-бирибизди тааныйбыз», – деди мамлекет башчы.

Ал белгилегендей, бул маданий жакындык биздин мамлекеттер аралык мамилелерибизде өзгөчө ишеним атмосферасын түзөт.

«Бүгүнкү күндө дал ушул ишенимдүү пайдубалдын негизинде биздин заманбап диалогубуз – ачык, тең укуктуу жана өз ара урматтоого жана ишенимге негизделген түзүлүп жатат.

Монголия менен ар тараптуу кызматташуу Кыргызстандын тышкы саясатын өнүктүрүүнүн приоритеттүү багыттарынын бири болуп саналат, деп белгиледи Садыр Жапаров жана бул сапар саясий диалогду мындан ары да чыңдоого, соода-экономикалык байланыштарды кеңейтүүгө жана маданий-гуманитардык кызматташтыкты өнүктүрүүгө күчтүү түрткү берерине ишенимин билдирди.

Өз кезегинде Монголиянын Президенти Ухнаагийн Хурелсух жылуу кабыл алуу жана меймандостук үчүн ыраазычылык билдирип, бул сапар Кыргызстандын Президенти менен биргеликте эки тараптуу мамилелердин 30 жылдык жолун жыйынтыктоого, жетишилген макулдашууларды ишке ашырууга баа берүүгө, ошондой эле конкреттүү экономикалык мазмунга толгон кызматташуунун артыкчылыктуу багыттарын жана келечегин аныктоого жакшы мүмкүнчүлүк түзөрүн баса белгиледи.

"Монголия үчүн Кыргызстан Борбордук Азиядагы маанилүү өнөктөш жана аймакты байланыштырган көпүрө болуп саналат. Биз бардык тармактарда, өзгөчө соода-экономикалык чөйрөдө өз ара пайдалуу кызматташтыкты өнүктүрүүгө умтулабыз", – деп белгиледи Монголиянын Президенти.

Ал 1992-жылы дипломатиялык мамилелер түзүлгөндөн бери Монголия менен Кыргызстандын ортосундагы өнөктөштүк аймактык жана эл аралык деңгээлде ырааттуу өнүгүп келе жатканын баса белгиледи.

Ухнаагийн Хурелсух ошондой эле биргелешкен күч-аракеттердин аркасында акыркы жылдары саясий диалог активдешип, экономикалык кызматташтык динамикалык мүнөзгө ээ болгондугуна канааттануусун билдирди.

Соңунда Монголиянын Президенти азыркы мамлекеттик сапар алгылыктуу динамиканы улантып, эки тараптуу мамилелердин келишимдик-укуктук базасын чыңдоого, ошондой эле айыл чарба, маданият жана илим тармактарында кызматташууну кеңейтүүгө багытталган жаңы документтерге кол коюу менен коштолооруна ишеним билдирди.