Өзбекстандын борборунда Өзбекстан Республикасынын Жогорку билим, илим жана инновациялар министрлиги жана КМШнын Аткаруу комитетинин колдоосу менен Инновациялык өнүктүрүү агенттиги тарабынан уюштурулган КМШнын тарыхындагы биринчи инновациялык өнүгүү форуму өттү.

Форумга КМШнын Башкы катчысынын орун басары Денис Трефилов башында турган КМШнын Аткаруу комитетинин делегациясы катышты., иш-чараны жогорку деңгээлде уюштургандыгы үчүн өзбек тарапка ыраазычылык билдирди. Ал форумду Илимий-техникалык жана инновациялык чөйрөлөрдөгү кызматташтык боюнча мамлекеттер аралык кеңештин жыйыны менен бирге өткөрүү биргелешкен практикалык чечимдерди иштеп чыгуу үчүн уникалдуу аянтча түзөрүн баса белгиледи.

Трефилов дүйнөлүк технологиялык чакырыктар шартында КМШ өлкөлөрүнүн илимий-техникалык суверенитетин камсыз кылуу зарылчылыгына көңүл буруп, бул багыттардагы кызматташтыктын стратегиялык маанисин белгиледи. Ал ошондой эле Шериктештиктин алкагында илимий-техникалык жана инновациялык тармактарда өнөктөштүктү өнүктүрүү үчүн жагымдуу шарттардын жана олуттуу потенциалдын бар экендигин белгиледи.

КМШнын башкы катчысынын орун басары форумдун үзгүлтүксүз өткөрүлүшү туруктуу диалогду колдоого мүмкүндүк берип, ошондой эле биргелешкен долбоорлорду жана демилгелерди ишке ашыруу үчүн бекем негиз түзөөрүнө ишеним билдирди.

КМШнын инновациялык өнүгүү форумунун негизги максаты технологиялык жетишкендиктерди, экономикалык өсүштү жана аймактагы чек ара өнөктөштүгүн бекемдөө үчүн биргелешкен чөйрөнү түзүүгө көмөк көрсөтүү болуп саналат.

Иш-чара КМШ өлкөлөрүндөгү илимий-техникалык жана инновациялык демилгелерди колдоо, биргелешкен долбоорлорду ишке ашыруу үчүн эффективдүү аянтча түзүүгө, илимий уюмдардын кызматташуусун бекемдөөгө жана технологияларды трансферт жана коммерциялаштыруу жаатында мамлекеттик-жеке өнөктөштүктү кубаттоого багытталган.

Форумдун катышуучулары заманбап технологияларды өнүктүрүүнүн актуалдуу маселелерин жана келечектүү инновациялык долбоорлорду илгерилетүү жана коммерциялаштыруу боюнча КМШга мүчө-мамлекеттердин инновациялык кызматташуусунун мамлекеттер аралык программасынын келечегин талкуулашты.