Душанбе, 31-май – “Караван Инфо” МА.Душанбеде өткөн мөңгүлөрдү сактоо боюнча жогорку деңгээлдеги эл аралык конференциянын алкагында Душанбенин ЭКСПО борборунда Тажикстан Республикасынын товарларынын өнөр жай көргөзмөсүнүн салтанаттуу ачылышы болду.

Иш-чара Тажикстан Республикасынын Өнөр жай жана жаңы технологиялар министрлиги тарабынан уюштурулуп, өлкөнүн өнөр жай потенциалын көрсөтүү, экспорттук багытты бекемдөө, чет элдик компаниялар менен өнөктөштүк мамилелерди түзүү, өлкөнүн төртүнчү стратегиялык максаты – тездетилген индустриялаштыруу багытын ишке ашырууга багытталган.

Көргөзмөдө машина куруу, химиялык өнөр жай, текстиль, тоо-кен, курулуш материалдары, көмүр өнөр жайы, IT-технологиялар, энергетика, тамак-аш жана айыл чарба тармактары боюнча павильондор коюлган. Тажикстандын өнөр жай ишканалары ата мекендик продукциянын кеңири ассортиментин тартуулашты.

Ачык аянтчада өлкөдө өндүрүлгөн жана чогултулган жүргүнчүлөрдү жана жүктөрдү ташуучу унаалар, айыл чарба техникалары, ошондой эле аскердик-өнөр жай комплексинин үлгүлөрү коюлган.

Уюштуруучулардын айтымында, мындай иш-чаралар Тажикстандын эл аралык аброюн көтөрүүдө, инвестиция тартууда, экспорттук мүмкүнчүлүктөрдү кеңейтүүдө жана жогорку технологиялык өндүрүштү жайылтууда негизги ролду ойнойт.

Көргөзмөгө эл аралык конференциянын катышуучулары, эл аралык жана улуттук уюмдардын, жеке сектордун, илимий жана каржы институттарынын өкүлдөрү келип, Тажикстандын өнөр жайынын өнүгүүсүн жогору баалап, мындан аркы кызматташууга даяр экендиктерин билдиришти.

СУРвТТв: республиканын енер жай министерствосу