Тогуз-Торо районуна Жети-Өгүз районунун Саруу айылындагы питомниктен 2500 түп карагаттын, 50 түп чычырканактын «Алтай» сортундагы көчөттөрү алынып келинди.

Айыл чарба министрлигинин басма сөз кызматы билдиргендей, бул үчүн Тогуз-Торо айыл өкмөтүнө караштуу Дөдөмол айылынын жергиликтүү тургуну КАПК программасынын алкагында «Элдик Банк» ААК аркылуу 3 жылдык мөөнөткө жылдык 6% менен 250 миң сом насыя алган.

Мындан тышкары, 2 сотых жер тилкесин тосууга өздүк каражатынан 150 миң сом бөлүнгөн. мында 2000 карагаттын көчөттөрү отургузулган (сорттору: Белорусская сладкая, Ленинградская, Белая Фея, Капитан).

Мындан тышкары оригиналдуу «Алтай» сортундагы чычырканактын 30 көчөтү отургузулду. Калган 500 түп карагаттын жана 20 түп чычырканактын көчөттөрү райондун 22 дыйканына таратылды.