2025-жылдын 26-апрелинде Алматы шаарында Кыргыз Республикасынын Тышкы иштер министри Ж.Кулубаев Борбордук Азия-Кытай форматындагы тышкы иштер министрлеринин 6-жыйынына катышты.

Жолугушуунун жүрүшүндө тараптар саясий, соода-экономикалык жана маданий-гуманитардык чөйрөлөрдө кызматташууну мындан ары чыңдоо маселелерин талкуулашты. Өндүрүш жана инвестиция, экономика жана соода, айыл чарба, транспорт, бажы, коомдук коопсуздук, өзгөчө кырдаалдарды башкаруу, билим берүү жана башка тармактарда түзүлгөн кызматташтык механизмдерин активдештирүү белгиленди.

Регионалдык жана эл аралык күн тартибиндеги актуалдуу маселелер боюнча пикир алмашуу болуп, БУУ, ШКУ, АӨСШК жана башка көп тараптуу форматтардын алкагында кызматташууну чыңдоонун маанилүүлүгү белгиленди.

Министрлер үстүбүздөгү жылы Астанада өтө турган “Борбор Азия – Кытай” экинчи саммитине даярдыкка өзгөчө көңүл бурушту. Күн тартибиндеги негизги маселелер, жыйындын мазмундук бөлүгү, кол коюла турган документтердин тизмеси, ошондой эле Саммитти өткөрүүнүн алдында пландаштырылган иш-чаралар талкууланды.

Бул форматтагы катчылыктын ишин уюштуруу маселелери жана мындан аркы кызматташуунун келечеги өз-өзүнчө талкууланды.

Кыргыз Республикасынын Тышкы иштер министри Ж.Кулубаев “Борбордук Азия – Кытай” форматы Кытай менен өнөктөштүктө Борбордук Азия регионунун ишенимин, жакшы кошуналыгын жана гүлдөп өнүгүүсүн чыңдоонун, ошондой эле аймактык жана глобалдык маселелерге макулдашылган мамилени иштеп чыгуунун маанилүү механизми экенин баса белгиледи. Ал ошондой эле кызматташуунун конкреттүү багыттары боюнча кыргыз тараптын сунуштарын жана демилгелерин билдирди.

Отурумдун жыйынтыгында учурдагы 6-жыйынынын жыйынтыктарын чагылдырган Биргелешкен коммюнике кабыл алынды.