Улуттук статистикалык комитетте Улуттук статистикалык комитеттин төрагасы Бактыбек Кудайбергенов менен Кыргыз Республикасынын Президентинин тоолуу аймактарды өнүктүрүү боюнча атайын өкүлү Динара Кемелованын жумушчу жолугушуусу болуп өттү.

Жыйынга ошондой эле Кыргыз Республикасынын Президентине караштуу Улуттук стратегиялык демилгелер институтунун жана Кыргыз Республикасынын Министрлер Кабинетине караштуу Жер ресурстары, кадастр, геодезия жана картография мамлекеттик агенттигинин өкүлдөрү катышты.

Талкуунун негизги темасы болуп тоолорду өнүктүрүү жаатындагы натыйжалуу мамлекеттик саясатты мониторингдөө жана ишке ашырууда, атап айтканда географиялык, демографиялык, социалдык, экономикалык жана экологиялык аспектилерди комплекстүү изилдөөдө расмий статистиканын негизги ролу болду.

Жолугушуунун жүрүшүндө катышуучулар Тоолуу күн тартибин статистикалык камсыздоо маселелерин, ведомстволор аралык кызматташуунун зарылдыгын, маалыматтарды чогултуунун жана талдоонун заманбап ыкмаларын, анын ичинде мейкиндик жана геомаалыматтык каражаттарды колдонуу маселелерин талкуулашты.

Жыйынтыгында Улуттук статистикалык комитеттин төрагасы Бактыбек Кудайбергенов Улуттук статистикалык комитет колдонуучулардын реалдуу керектөөлөрүнө негизделген статистиканы түзүүгө умтулуп, улуттук өнүктүрүү саясатынын алкагында негизделген чечимдерди кабыл алууга көмөктөшүп, диалогго жана кызматташууга ачык бойдон калаарын баса белгиледи.