КАБУЛ, 22-июль, 2025-жыл – Караван инфо маалымат агенттиги.Улуу Британиянын Ооганстан боюнча жаңы дайындалган атайын өкүлү Ричард Лэнси Кабулга келип, ал жерде ооган коомчулугунун өкүлдөрү, анын ичинде талиптердин министрлери менен жолугушту.

«Ооганстан инклюзивдүү катышуу жана диалог аркылуу гана өнүгө алат», – деп баса белгиледи дипломат.

Анын айтымында, ал талибдер менен саламаттыкты сактоо, Иран менен Пакистандан депортацияланган качкындар жана гуманитардык жардамдын муктаждыгы тууралуу сүйлөшкөн.

Лэнси атайын өкүл катары кызматына 2025-жылдын июнь айында киришкен. Ал буга чейин Тышкы иштер жана Шериктештик министрлигинин Шериктештик жана өнүктүрүү иштери боюнча директордун орун басары болуп иштеген.

Анын мандаты талиптер менен терроризмге каршы күрөшүү, адам укуктары, инклюзивдүү өкмөттү колдоо жана гуманитардык жардамга жетүү сыяктуу маселелер боюнча диалогду камтыйт. Аялдарды, этникалык жана диний азчылыктарды коргоого өзгөчө көңүл бурулат.

Ленси ошондой эле Британияга Ооганстандагы максаттарына жетүүгө жардам берүү үчүн эл аралык жана аймактык өнөктөштөр менен кызматташууну көздөйт. Байкоочулардын баамында, Британия талибдер менен, өзгөчө, Кабулда уюмдун тышкы иштер министри менен үзгүлтүксүз жолугушуулары аркылуу эң активдүү Европа өлкөсү.

Сүрөт: Караван ААнын өнөктөштөрү