БОРБОРДУК АЗИЯ, 7-август, 2025-жыл – Караван инфо маалымат агенттиги.Өзбекстандын президенти Шавкат Мирзиёев Түркмөнстанда өткөн аймактык лидерлердин жыйынында Трансафган темир жолу долбоорун тез арада ишке ашырууга чакырды. Ал долбоорду аймактын экономикалык өнүгүүсү үчүн өтө маанилүү деп атады.

Мирзиёев бул долбоор аймактык соода жана транспорт үчүн жаңы инфраструктура түзөрүн айтты.

"Биз Өзбекстан-Ооганстан-Пакистан темир жол долбоорун даярдоону жана ишке ашырууну тездетүүгө чакырабыз. Бул каттам курулуп жаткан Кытай-Кыргызстан-Өзбекстан темир жолу менен биригип, биздин кең аймакка жаңы соода-экономикалык мүмкүнчүлүктөрдү ачып, туруктуу транспорттук инфраструктураны түзөт",-деди Мирзиёев БУУнун деңизге чыга албаган өлкөлөр боюнча конференциясында.

Трансафган темир жолунун курулушунун техникалык-экономикалык негиздемеси боюнча келишимге өткөн айда Кабулда Талибандын Коомдук иштер министрлиги, Өзбекстандын Транспорт министрлиги жана Пакистандын Темир жолдор министрлиги ортосунда кол коюлган.

Келишимге үч өлкөнүн тышкы иштер министрлеринин катышуусунда кол коюлду.

Сүрөт: Караван Инфонун өнөктөштөрү