Жайкы каникулдарды утурлай редакция Эмгек, социалдык коргоо жана миграция министрлигине жашы жете элек кызматкерлер үчүн уруксат берилген жумуш убактысын сурап кайрылган.

Эмгек кодексине ылайык, 16 жашка толгон жарандар иштөөгө уруксат берилет. Кээ бир учурларда 15 жаштан баштап өспүрүмдөрдү ишке орноштуруу кызматкерлердин өкүлчүлүктүү органынын же эмгек чөйрөсүндөгү ыйгарым укуктуу мамлекеттик органдын макулдугу менен мүмкүн.

Ошондой эле ата-энесинин биринин (камкорчу, көзөмөлчүсү) же камкорчулук жана көзөмөлчүлүк органынын милдеттүү түрдө жазуу жүзүндөгү макулдугу менен 14 жаштан жогорку окуучулар менен эмгек келишимин түзүүгө жол берилет. Мындай өспүрүмдөр бош убактысында гана ден соолугуна зыян келтирбеген, окуу процессине тоскоол болбогон жеңил жумуштарды аткара алышат.

Кыргыз Республикасынын мыйзамдарында жумуш күнүнүн узактыгына чектөөлөр каралат:

• 14 жаштан 16 жашка чейинки өспүрүмдөр үчүн – күнүнө 5 сааттан ашык эмес;
• 16 жаштан 18 жашка чейинки өспүрүмдөр үчүн – күнүнө 7 сааттан ашык эмес.

Жашы жете элек адам жумуш менен окууну айкалыштырса, жумуш убактысынын узактыгы төмөндөйт:

• 14-16 жаш – күнүнө 2,5 сааттан ашык эмес;
• 16–18 жаш – күнүнө 3,5 сааттан ашык эмес.

Министрлик ошондой эле Кыргыз Республикасында балдар эмгегин эң начар формада колдонууга катуу тыюу салынганын баса белгилейт. Иш берүүчүлөр жашы жете электерди жумушка алууда эмгек мыйзамдарынын бардык талаптарын сактоого милдеттүү.