КР Жаратылыш ресурстары, экология жана техникалык көзөмөл министрлиги Ысык-Көл облусунун Жети-Өгүз районундагы Чым-Там жайлоосунда майда мүйүздүү малдардын массалык кырылышы боюнча окуяга чара көрдү. Окуя 2025-жылдын 10-июнунан 11-июнга караган түнү М.Амазбаев менен Т.Жунушовдун жарандарынын чарбасында болгон.

Алдын ала маалыматтар боюнча, 1200гө жакын койдун ичинен жырткыч 10дон ашпаган жандыкка кол салса, калгандары дүрбөлөңгө түшүп, тебеленип өлгөн. 330дан ашуун өлгөндөр тууралуу маалымат кошумча текшерүүнү талап кылат. Учурда кол салууну ак илбирс жасаганы тастыктала элек.

Министрлик Кыргыз Республикасындагы “Илбирс” фонду жана “Ак илбирс” фонду менен биргеликте үй ээлери менен ыкчам аракеттенүүнү уюштуруп, далилдерди чогултуп, жардам көрсөтүштү. “Ак илбирс” фонду ири жырткычтардын кирип кетпеши үчүн күчөтүлгөн короо курууга даяр.

Жакынкы арада тиешелүү мекемелердин, илимий коомчулуктун жана бейөкмөт уюмдардын катышуусунда жооп протоколдорун өркүндөтүү жана жырткычтар жашаган аймактарда малды коопсуз кармоо боюнча малчыларга түшүндүрүү иштерин жүргүзүү үчүн ведомстволор аралык кеңешме өткөрүү пландаштырылууда.

Ведомство сейрек кездешүүчү жаныбарларды, анын ичинде ак илбирсти коргоо приоритеттүү болуп кала берээрин, бирок ошол эле учурда жарандардын өмүрүн жана мүлкүн коргоо маанилүү экенин белгиледи.