Кыргыз Республикасынын Жогорку Кеңешинин Төрагасы Нурланбек Тургунбек уулу Португалияга болгон иш сапарынын алкагында Порту шаарында жайгашкан футбол стадионунда болду.

Бул спорттук жай 2001-жылы курулуп, 2003-жылы 2004-жылы өткөн Европа чемпионаты үчүн ачылган. 52 миң киши бата турган стадиондун курулушуна 100 миллион еврого жакын каражат жумшалган. "Драгао" деп аталган спорттук жайда Европа чемпионаты, улуттук лиганын финалы жана 2021-жылы Манчестер Сити менен Челсинин финалдык беттештери сыяктуу көптөгөн эл аралык мелдештер өттү. Белгилей кетсек, 2003-жылы Порту клубу башкы машыктыруучу Жозе Моуриньонун жетекчилиги астында Европа футбол ассоциацияларынын биримдигинин (УЕФА) жана Португалия Суперлигасынын негизги оюндарында жеңишке жетишкен.

Футболчулар жана күйөрмандар үчүн түзүлгөн шарттар менен таанышып, стадиондун жетекчилиги менен жолуккан Нурланбек Тургунбек уулу акыркы жылдары Кыргызстанда да спорттун бул түрүн өнүктүрүүгө өзгөчө көңүл бурулуп жатканын баса белгиледи.

"Ошондуктан Португалиянын тажрыйбасы биз үчүн абдан маанилүү. Учурда Бишкекте 50 миңден ашык кишиге эсептелген Борбор Азиядагы эң чоң футбол стадиону курулуп жатат. Ал ишке берилгенден кийин республикалык гана эмес, эл аралык мелдештерди да жогорку деңгээлде өткөрүүгө шарттар түзүлөт", — деди Төрага.

Ошол эле учурда Португалия да мыкты футболчулары менен белгилүү экенин кошумчалады.

"Футбол жөн эле оюн эмес. Азыркы дүйнөлүк шартта бул достукту жана мамлекеттер аралык байланышты чыңдаган дипломатиялык мүмкүнчүлүктөрдүн бири. Ошого жараша биздин өлкөлөр бул жаатта кызматташууга артыкчылык бериши керек. Кыргыз футболчулары өзгөчө дүйнөгө таанымал португалиялык футболчулардын тажрыйбасын жана оюн ыкмаларын үйрөнүүгө кызыкдар", – деди Нурланбек Тургунбек уулу.

Белгилей кетсек, ушуну менен Төраганын Португалияга иш сапары аяктап, бүгүн, 3-июлда Бишкекке кайтып келди. Нурланбек Тургунбек уулу бул өлкөгө Европа коопсуздук жана кызматташтык уюмунун Парламенттик ассамблеясынын (ЕККУ ПА) кезектеги жыйындарына катышуу үчүн барган.