Кыргыз Республикасынын Президенти Садыр Жапаров онлайн-байланыш аркылуу Кытай Эл Республикасы, Кыргыз Республикасы жана Өзбекстан Республикасынын өкмөттөрүнүн ортосундагы «Кытай-Кыргызстан-Өзбекстан темир жолун куруу жөнүндө макулдашууга» кол коюу аземине катышты.

“Бул долбоор белгилүү “Бир алкак – бир жол” демилгесинин маанилүү компоненти болуп калат.Темир жол Кытай менен Борбор Азия өлкөлөрүн байланыштырып, Европа менен Перс булуңунун өлкөлөрүнө мындан ары жаңы транспорттук каттамдарды ачарын белгилеп кетүү жагымдуу. Бул биздин өлкөлөр ортосундагы соода-экономикалык кызматташууга ар тараптуу оң таасирин тийгизери талашсыз”, — деп белгиледи Кыргызстандын Президенти.

Келишимге иш жүзүндө кол коюу аземине Пекинде иш сапары менен жүргөн КР транспорт жана коммуникациялар министри Тилек Текебаев катышты. ошондой эле Кытай Эл Республикасынын өнугуу жана реформа боюнча мамлекеттик комитетинин председатели жана ©збекстан Республикасынын транспорт министри.

Бул долбоорду ишке ашыруу Борбор Азия мамлекеттерине эл аралык рынокко чыгууга жана аймактын статусун жакшыртууга мүмкүнчүлүк берет. Чыгыш Азиядан Түштүк Европа өлкөлөрүнө жеткирүү 900 километрге кыскарат. Жүк ташуулардын көлөмүнүн көбөйүшү күтүлүүдө, анткени жеткирүү мөөнөтү бир топ кыскарат.

«Кытай, Кыргызстан жана Өзбекстан өкмөттөрүнүн ортосунда Кытай-Кыргызстан-Өзбекстан темир жол долбоорун биргелешип алдыга жылдыруу боюнча кызматташуу жөнүндө макулдашууга кол коюлушу тарыхый жана маанилүү окуя болуп саналат.  Кыргызстандын президенти Садыр Жапаровдун жана эки өлкөнүн (Кытай жана Өзбекстан) лидерлеринин саясий чечкиндүүлүгүнүн аркасында сүйлөшүүлөр процесси аяктап, техникалык-экономикалык негиздеме иштелип чыкты жана долбоорду ишке ашыруу боюнча практикалык иш-аракеттер башталды», — деди Тилек Текебаев.