Кыргыз Республикасынын Министрлер Кабинетинин Төрагасынын орун басары Эдил Байсалов жана Президенттин “Тоолуу аймактарды өнүктүрүү боюнча беш жылдык иш-аракеттерди” ишке ашыруу боюнча атайын өкүлү Динара Кемелова жетектеген кыргыз делегациясы Бонндо өткөн БУУнун климаттык конференциясынын алкагындагы тоолор жана климаттын өзгөрүүсү боюнча глобалдык эксперттик диалогуна катышты.  Бул жолугушуу Кыргызстандын президенти Садыр Жапаровдун Дубайда өткөн климаттын өзгөрүшү боюнча акыркы конференциясындагы демилгесинин жыйынтыгы болду.

Иш-чарада Эдил Байсалов сөз сүйлөп, климаттык көйгөйлөрдү чечүүдө тоолуу жана башка өлкөлөрдүн аракеттерин бириктирүүнүн маанилүүлүгүн белгиледи. Ал ошондой эле аталган Диалогду жыл сайын өткөрүү идеясын колдоого чакырды. Негизги иш-чаранын алдында Андора жана Тоо шериктештигинин катчылыгы менен биргеликте уюштурулган кошумча иш-чара болуп өттү, анда тоолорду туруктуу өнүктүрүү аспектилери жана климаттын өзгөрүшүнө байланышкан маселелер талкууланды. Кыргызстандын бул жааттагы жетекчилиги катышуучулар тарабынан белгиленип, Диалогду жыл сайын өткөрүү демилгесине колдоолор айтылды.

Эдил Байсалов ошондой эле түрдүү өкүлдөр, анын ичинде Азербайжандын айлана-чөйрөнү коргоо министри М.Бабаев жана Жашыл климаттык фонддун өкүлдөрү менен жолугушууларды өткөрдү.  Келечектеги эл аралык иш-чараларды өткөрүү үчүн энергетика, жашыл экономика жана тоолорду туруктуу өнүктүрүү жаатында кызматташуунун келечеги талкууланды.

Кыргызстандын делегациясы климат жана тоолуу аймактарды туруктуу өнүктүрүү чөйрөсүндө эл аралык кызматташтыкты чыңдоого жигердүү колдоо көрсөтүүнү улантууда.

Сүрөт: Кыргыз Республикасынын Министрлер Кабинетинин расмий сайты