Қазақстанға «Тұрғын үй-коммуналдық шаруашылық ҚазОрталығы» АҚ шақыруы бойынша Stein Infrastructure Management GmbH компаниясының делегациясы келді, ол сумен жабдықтау және су бұру саласындағы техникалық күрделі жобаларды іске асыруда қолдауға маманданған ірі халықаралық инжинирингтік компаниялардың бірі болып табылады.

ТКШ ҚазОрталығы неміс компаниясы өкілдерінің «Степногорск Теплотранзит» ЖШС және «Астана Су Арнасы» МКК қазақстандық кәсіпорындарымен кездесулерін ұйымдастырды. Келіссөздер барысында Қазақстанның инфрақұрылымдық активтерін басқару бойынша қызметтер көрсету талқыланды. Бұдан басқа, «ТКШ ҚазОрталығы» АҚ коммуналдық сектор кәсіпорындарында SCADA жүйелерін әзірлеумен және орнатумен айналысатын KAZDEVSOLUTION ЖШС компаниясымен кездесу ұйымдастырды.

Кездесуде тараптар «Қазақстандық тұрғын үй-коммуналдық шаруашылықты жаңғырту және дамыту орталығы» АҚ мен STEIN Infrastructure Management GmbH компаниясы арасындағы ынтымақтастық мүмкіндіктерін талқылады. Сонымен қатар, қатысушылар активтерді басқару және сумен жабдықтау және су бұру ұйымдарының қаржылық тұрақтылығын қамтамасыз ету стратегияларын, сондай-ақ су ресурстарын басқаруды пәнаралық жоспарлау процестеріне біріктіруді талқылады. Тәжірибе алмасу және қызметкерлердің біліктілігін арттыру бағдарламалары жеке қаралды.

STEIN Infrastructure Management GmbH компаниясы инфрақұрылымдық дамудың барлық аспектілерінде кешенді қолдау көрсетуге дайын екендігі атап өтілді.

Кездесу қорытындысы бойынша өзара түсіністік туралы Меморандумға қол қойылды.

Фото: Қазақстан Республикасы Өнеркәсіп және құрылыс министрлігі