Ўтган ҳафта охирида Шымкент шаҳрида сув хўжалигини бошқариш бўйича давлатлараро Мувофиқлаштирувчи комиссиянинг 86-йиғилиши бўлиб ўтди.

Тадбир доирасида Сирдарё дарёси ҳавзасига уланган ҳудудларни сув билан таъминлашни яхшилаш мақсадида “Баҳри Тожик” сув омборидан қўшимча сув ўтишини ташкил этиш тўғрисидаги протокол лойиҳаси кўриб чиқилди. Учрашувда Протоколни 2024 йил май ойида имзолашга қарор қилинди.

Ўзбекистон Республикаси Сув хўжалиги вазири Шавкат Хамраев 2023 йилги вегетация даври муваффақиятли якунланганини қайд этиб, “Баҳри Тожик” сув омборидан қўшимча сув чиқариш бўйича уч томонлама битимни амалга оширишга чақирди. Вазир ушбу фаолиятни тезлаштириш муҳимлигини таъкидлади.

Ш. Хамраев, шунингдек, “Амударё” ва “Сирдарё” ҳавзалари сув хўжалиги бирлашмалари ва уларнинг ҳудудий бўлинмаларига, илмий ахборот маркази ва Комиссия Котибиятига 2023 йилги вегетация даврини муваффақиятли амалга оширишга қўшган ҳиссаси учун миннатдорлик билдирди.

Йиғилишда минтақада сув ресурсларидан самарали ва оқилона фойдаланиш, “Оролни қутқариш халқаро жамғармаси”га асос солган давлатлар раҳбарларининг саммитларида илгари сурилган ташаббусларни амалга ошириш юзасидан маърузалар тингланди.

Амударё ва Сирдарё дарёлари ҳавзаларида 2024 йил вегетация даври учун сув олишнинг давлат чегаралари ва сув омборлари каскадларининг прогноз режими тасдиқланди.

Эслатиб ўтамиз, давлатлараро Мувофиқлаштирувчи сув хўжалиги комиссиясининг 87-йиғилишини 2024 йилда Туркманистонда ўтказишга қарор қилинган эди.