Өткен аптада Ұлт сарайында Тәжікстан Президенті Эмомали Рахмон мен Түркіменстан Халық Маслахатының төрағасы Гурбангулы Бердімұхамедов арасында келіссөздер өтті.

Кездесуде тараптар мемлекетаралық қарым-қатынас мәселелерін талқылап, халықаралық және өңірлік күн тәртібіндегі өзекті үрдістер туралы пікір алмасты.

Мемлекетаралық келіссөздер барысында екі ел арасындағы, оның ішінде мұнай-газ, химия және металлургия өнеркәсібі салаларындағы ынтымақтастықты одан әрі дамыту перспективалары қарастырылды. Тараптар ауыл шаруашылығы мен жүк тасымалы саласындағы ынтымақтастықты талқылады.

Мәдени-гуманитарлық ынтымақтастық пен өңірлік және халықаралық ұйымдар аясындағы өзара іс-қимылды нығайту мәселелері де көтерілді.

Аймақ қауіпсіздігін қамтамасыз ету және екі елдің тиісті құрылымдары арасындағы ынтымақтастықты нығайту, соның ішінде терроризм мен экстремизмге қарсы күрес мәселелеріне де ерекше назар аударылды.