Тажикстан Республикасынын өнөр жай жана жаңы технологиялар министри Шерали Кабир БУУнун штаб-квартирасында өткөн Туруктуу өнүгүү максаттарына жетүү үчүн илим, технология жана инновациялар боюнча көп тараптуу 9-форумга катышты.

Бай жаратылыш ресурстары жана жаш калкы бар Тажикстан олуттуу кайра куруунун алдында турат. Учурда республикада 2040-жылга чейин жасалма интеллектти өнүктүрүү Стратегиясы кабыл алынган. Ошентип Тажикстан мындай документти кабыл алган Борбор Азия өлкөлөрүнүн ичинен биринчи болуп калды.

Мындан тышкары, республиканын Өкмөтү климаттын өзгөрүүсү, жакырчылык, саламаттыкты сактоо жана билим берүү сыяктуу улуттук жана глобалдык көйгөйлөрдү чечүүдө илим менен технологиянын маанилүү ролун тааныйт.

Тажикстандын өкүлдөрү форумдун катышуучуларына өлкөнүн саясий, экономикалык жана социалдык жетишкендиктери, стратегиялык максаттары жана мамлекеттик программалары тууралуу маалымат беришти, жагымдуу инвестициялык климат жана долбоорлор, ошондой эле соода жана туризм мүмкүнчүлүктөрү тууралуу айтып беришти.

Сүрөттө: Тажикстан Республикасынын Бириккен Улуттар Уюмундагы туруктуу өкүлчүлүгү