Пекинде (Кытай) Тажикстан менен Кытайдын Соода-экономикалык кызматташуу боюнча өкмөттөр аралык комиссиясынын 13-жыйыны өттү. Иш-чараны Тажикстан Республикасынын Экономикалык өнүгүү жана соода министри Завкизода Завки Амин жана Кытай Эл Республикасынын Коммерция министринин орун басары, соода сүйлөшүүлөрүнүн куратору Лин Цзы алып барышты.

Тажикстандын Экономикалык өнүгүү жана соода министрлигинен билдиришкендей, жолугушууда тиешелүү протоколго кол коюлду. Тажик департаментинин министри стратегиялык өнөктөштүктү бекемдөөгө эки өлкөнүн жетекчилеринин – Тажикстан Республикасынын Президенти Эмомали Рахмондун жана Кытай Эл Республикасынын Төрагасы Си Цзиньпиндин кошкон олуттуу салымын белгиледи.

Кытай Тажикстандын экинчи ири соода өнөктөшү болуп саналат жана өлкөнүн экономикасынын түрдүү тармактарына активдүү инвестиция салууда. 2023-жылы Тажикстан Республикасы менен Кытай Эл Республикасынын ортосундагы тышкы сооданын көлөмү 1,5 миллиард долларды түздү, бул 2022-жылга салыштырмалуу 24,2 пайызга жогору.

Тажикстандын өкмөт жана парламентинин жаңы имараттарынын курулуш иштери жакынкы аралыкта аяктап, инвестиция, электрондук коммерция, жаңы энергия булактары жана тоо-кен тармагында тиешелүү келишимдер түзүлөрү белгилүү болду.

Мындан аркы кызматташуу үчүн тараптар артыкчылыктуу инвестициялык долбоорлорду, анын ичинде жашыл энергетиканы, «Тажик алюминий» компаниясын модернизациялоону, Дангара аймагындагы логистикалык борборду, Дүйшөмбү шаарында 4 эстакадалык көпүрөнү курууну жана Варшез-Кулма автожолун реконструкциялоону макулдашышты.